Қазақстанның оңтүстігінде болған қайғылы өрт туралы жаңа деректер белгілі болды. Түркістан облысындағы жеке үйде болған өрт салдарынан 12 адам, оның ішінде 9 бала қаза тапты, деп хабарлайды Malim.kz.
Балалардың құқықтары жөніндегі уәкіл Динара Закиева өз әлеуметтік желісінде оқиғаның егжей-тегжейін жариялады. Оның айтуынша, өрт 18 қараша таңертең Жетісай ауданындағы Алғабас ауылында болған.
«Үйде екі отбасы – ата-аналар мен балалар болған. Өрт шығып, үйдің шатыры опырылып түскен. Өңірлік уәкіл психологтермен бірге оқиға орнына барды. Қазір өрттің шығу себептері мен жағдайлары зерттеліп жатыр. Туыстарына көңіл айтамыз», – деді ол.
Түркістан облысы полициясы Жетісай ауданындағы бұл өртке қатысты «Өрт қауіпсіздігі талаптарын бұзу» бабымен қылмыстық іс қозғады.
Полицияның мәліметінше, қазір оқиғаның барлық мән-жайын анықтауға бағытталған тиісті іс-шаралар жүргізіліп жатыр. Тергеу нәтижесі бойынша процессуалдық шешім қабылданады.
Айта кетейік, өрт сөндірушілер оқиға орнына жеткенде үй толықтай өртке оранған.
«Барлау және өртті сөндіру кезінде үйден ес-түссіз жатқан үш адам эвакуацияланып, жедел жәрдем қызметіне тапсырылды. Сонымен қатар үйдің ішінен 12 адамның мәйіті табылды, олардың тоғызы – балалар», – делінген ДЧС мәліметінде.
Президенттің баспасөз хатшысы Руслан Желдібай бұл оқиғаға байланысты Үкімет пен облыс әкіміне марқұмдардың жақындарына барлық қажетті көмекті көрсетіп, өрттің себептерін толық тергеуді тапсырғанын хабарлады.
Түркістан облысы әкімдігі де Президент тапсырмасымен арнайы жұмыс тобы құрылғанын мәлімдеді. Зардап шеккендерге медициналық және психологиялық көмек көрсетілуде.
