Ақын Ақберен Елгезек Мұхамеджан Тазабектің Мағауин туралы жазбасына жауап беріп, кемеңгер жазушының «елден Қазақ үшін, қазақтың шашылып жатқан тарихын жүйелеп беру үшін» кеткенін айтты. Бұл ойын әлеуметтік желіде білдірген, деп хабарлайды Malim.kz.
Оның айтуынша Мағауин «еліне өкпелейтіндей ақымақ адам» емес. Ол шетелге халқына өкпелеп кеткен жоқ.
Өз ұлтының руханиятына ғұмырын бағыштаған екен, онда ол ойыншық бермедің деп өкпелейтін қырсық бала сияқты бұртиып, өз туған еліне беталбаты ренжіп кетпейді. Оның үстіне сабалса да еліне ренжімей, қарымта аламыз дегендерді сабырмен тоқтатқан, өзінің идеалы болған Абайдың оқиғасын Мағауин жақсы біледі, дейді А.Елгезек.
Ол, сондай-ақ, «Мағауин қазақтың құрметінің арқасында Мағауин болды» деп санайды. Қазақ болмаса, Мағауин ешкімге керек емес деген ойын айтады. Сондықтан «Мағауин қазаққа ренжіп кетті», «қазақты Мағауин «талақ» етіп кетті» деген әңгіме мүлде жөнсіз сөз деген ойын айтады.
Бұдан соң ол Мағауин неге шетелге кетті деген сұраққа өз жауабын ұсынды. А.Елгезектің ойынша, Мағауин елден қазақ үшін кеткен.
Мағауиннің алдында ұлы мақсат тұрды, оны ол орындау керек болды. Егер ол елде қалып, бітпейтін шаралар, тойлар, өлім-жітім, астар, дау-шарлар, қонаққа бару, биліктің қолқалауымен амалсыз бірдеңелерді жазу сияқты қыртқан тірліктен көз ашпайтын еді. Әрі денсаулығы тез нашарлап, тіпті қажитын еді. Олай болса, қазір 4 том «Шыңғысхан» да жоқ, «Жармақ» та жоқ, «Алтын орда» да жоқ, бірнеше том әртүрлі әңгімелер, естеліктер т.б. енді ұлттың қазынасы боп қалған еңбектер де қазақтың сөресінде тұрмаушы еді. Мағауин – елден Қазақ үшін кетті, қазақтың шашылып жатқан тарихын жүйелеп беруге кетті. Біреуден бірдеңе сұрады ма, мемлекетке осыны істеп жатырмын деп міндетсіді ме?! Жоқ! Талай қазақ не істерін білмей, ақшасын қайда шашарын білмей біресе елден кетіп, біресе қайтып кеп, бұлталақтап жүргенде, Мағауин далиып жағажадайда жатқан жоқ, керісінше ешкімді танымайтын елде тас үйге кіріп алып, талмай жұмыс істеді, дейді жазба авторы.
Ақберен Елгезек елден кеткен адамның телефоны да, құлағы да тыныш болатынын айтып, ойын түйіндеген.
