Чехия үкіметі Ресейден мұнай импортына тәуелділіктің толық тоқтағанын ресми түрде мәлімдеді. Бұл туралы елдің премьер-министрі Петр Фиала 17 сәуір, бейсенбі күні жария етті, деп хабарлайды Malim.kz.
«Чех Республикасы алғаш рет тарихында Ресейден келмейтін мұнаймен толық қамтамасыз етіліп отыр», – деді ол.
Премьердің айтуынша, енді елге мұнай Каспий маңы елдерінен, Таяу Шығыстан және Солтүстік Африкадан жеткізіледі. Бұл шикізат Чехияға Трансальпі құбыры (TAL) және оның тармағы – IKL арқылы жеткізіледі. Құбыр инфрақұрылымын кеңейтуге шамамен 60 миллион еуро жұмсалған.
TAL құбыры Италияның Триест портынан бастап Оңтүстік Германияға дейін созылып жатыр, ал Германия аумағынан чех құбыры IKL-мен жалғасады. Бұл құбыр арқылы жылына сегіз миллион тоннаға дейін мұнай тасымалдауға болады, бұл Чехияның жылдық қажеттілігін толықтай өтейді, - дейді Фиала.
Бұдан бөлек, Чехия Ресейден табиғи газ сатып алуды да доғарған. Енді ел билігі жыл соңына дейін атом электр станцияларында ресейлік уранды пайдалануды да тоқтатуды жоспарлап отыр.
Соңғы 60 жыл бойы Чехия «Дружба» құбыры арқылы Ресей мұнайын тұтынып келген болатын. ЕО Ресей мұнайын импорттауға жаппай тыйым салғанымен, Чехия үшін «Дружба» арқылы жеткізуге уақытша рұқсат етілген еді, себебі баламалар аз болатын. Алайда биыл наурыз айының басында, TAL құбырының кеңейтілуінен кейін, «Дружба» арқылы жеткізілімдер тоқтатылды.
Фото: BERNADETT SZABO/REUTERS
