Ресей алғаш рет Украинаға шабуыл жасау үшін құрлықаралық баллистикалық зымыранды пайдаланды, деп хабарлады Украинаның Қарулы күштері.
Хабарламада айтылғандай, зымыран Астрахан облысынан ұшырылды. Ресей әскери күштері әзірге ешқандай түсініктеме берген жоқ.
Бірқатар телеграм-каналдар қару-жарақтың бұл түрін қолдану украин әскерлерінің Ресей аумағына Батыстың алыс қашықтықтағы қару-жарағын пайдаланғаны үшін жауап ретіндегі әрекеті екенін жазған болатын.
Еуроодақтың сыртқы саясат ведомствосының баспасөз қызметі егер Ресейдің құрлықаралық зымыранды қолдану фактісі расталса, бұл қақтығыстың жаңа деңгейге өтетінін мәлімдеді. АҚШ әзірге болып жатқан жағдайға еш түсініктеме берген жоқ.
Айта кетейік, Құрлықаралық баллистикалық зымырандар Ресей армиясындағы ең қуатты қару-жарақ қатарына жатады. Бұл сыныптағы зымырандар әдетте ядролық бөлімдермен жабдықталып, стратегиялық ядролық күштердің бөлігі саналады. Алайда зымырандар кәдімгі жарылғыш заттарды да көтере алады.
21 қарашаға қараған түні Украинаға жасалған соққы ядролық емес болды.
"Украинская правда" басылымының дереккөздері, сондай-ақ бірқатар телеграм-арналар соққы үшін РС-26 "Рубеж" зымыран кешені пайдаланылды деп мәлімдейді. Зымыран Днепр қаласына шабуыл жасау үшін пайдаланылды деген болжам бар.
Бүгін елімізге жаңа ресейлік зымыранмен соққы жасалды. Ол үшін құрлықаралық баллистикалық қару-жарақ пайдаланылды. Қазір сараптамалар жалғасуда, - Украина президенті Владимир Зеленский.
Фото: АР
