Сириядағы жағдай: оппозицияның Дамаскіні басып алғаны хабарланды

Сирия астанасы Дамаск оппозициялық күштердің қолына өткен сияқты. BBC жазуынша, елдің премьер-министрі Мұхаммед Гази әл-Джалали Башар Асадтың Дамасктан қашып кеткенін растады және билікті тапсыруға дайын екенін мәлімдеді, деп хабарлайды Malim.kz.

Ақпарат құралының жазуына қарағанда, таңғы сағат 06:00 шамасында көтерілісшілер Дамаскке кіріп, қала маңындағы Сайедная түрмесін басып алғандарын хабарлаған. Түрмеде отырған барлық тұтқын босатылған.

Сириядағы азаматтық соғыс басталғалы бері бұл түрмеге Башар Асад режиміне қарсы адамдар қамалған еді. Құқық қорғаушылардың айтуынша, алғашқы бес жылда мұнда 5-13 мың адам құпия жағдайда өлім жазасына кесілген.

CNN агенттігі көтерілісшілердің радио және теледидар ғимаратын басып алуды жоспарлап жатқанын хабарлады. Олар бұл ғимараттан жеңіс туралы мәлімдеме жасамақ.

Премьер-министр әл-Джалали биліктің бейбіт түрде тапсырылуын қолдайтынын айтты. Ол көтерілісшілермен жұмыс істеуге және халық таңдаған жаңа басшылықты қолдауға дайын екенін жеткізді. Көтерілісшілердің басшысы мемлекеттік мекемелер премьер-министрдің бақылауында қала беретінін мәлімдеді.

Башар Асадтың нақты қайда екені белгісіз. Reuters агенттігі дереккөздерге сілтеме жасап, Асадтың белгісіз бағытқа кеткенін хабарлады. SOHR оның жеке ұшағының Дамаск әуежайынан ұшып кеткенін болжайды. Әлеуметтік желілерде тараған фотода Дамаск әуежайында барлық рейстің тоқтатылғаны көрінеді, тек Мәскеуге ұшқан рейс тіркелген.

Сирия әскерінің офицерлері демобилизацияланып, жүздеген әскери формасын шешкен. CNN хабарлауынша, Дамаск әуежайында хаос орнап, тұрғындар елден кетуге тырысып жатыр.

Бір топ тұрғын Омейяд алаңына жиналып, Асад режимінің құлауын тойлауға кіріскен. Әлеуметтік желілерде тараған бейнелерде музыка ойнап, адамдардың тасталған танк айналасында билеп жатқаны көрінеді.

Фото: Louai Beshara/AFP via Getty Images