Жапонияда өткен XX жазғы Азия ойындары мәресіне жетті. Қазақстан құрамасы жарысты 84 медальмен – 12 алтын, 24 күміс және 48 қоламен аяқтап, 46 ел қатысқан жалпыкомандалық есепте сегізінші орынға тұрақтады, деп хабарлайды Malim.kz.
Биылғы додада қазақстандық спортшылар бірнеше тарихи нәтижеге қол жеткізді. Кейбір спорт түрлерінде ел қоржынына Азия ойындарындағы алғашқы алтын жүлделер түсті.
Қазақстан құрамасының жарқын жеңістерінің бірі бокстан тіркелді. Төрехан Сабырхан 70 келіге дейінгі салмақ дәрежесінде қарсыластарынан басым түсіп, Азия ойындарының чемпионы атанды. Сондай-ақ ұлттық құраманың капитаны Айбек Оралбай 90 келіден жоғары салмақ дәрежесінде алтын медаль жеңіп алды.
Семсерлесуден Қазақстан ерлер құрамасы да тарихи нәтиже көрсетті. Ерлік Сертай, Руслан Курбанов, Кирилл Проходов және Вадим Шарлаимов шешуші бәсекеде Оңтүстік Корея құрамасын 43:42 есебімен жеңіп, Қазақстанға Азия ойындарының осы спорт түріндегі тарихи алтынын сыйлады.
Академиялық есуден Владислав Яковлев пен Иван Чернухин ерлер арасындағы рульсіз қос ескекті қайық жарысында топ жарды. Бұл да Қазақстанның Азия ойындары тарихындағы академиялық есуден алған алғашқы алтын медалі болды.
Таеквондодан Тамирлан Тілеулес 58 келіге дейінгі салмақ дәрежесінде чемпион атанып, Қазақстан үшін тарихи нәтиже тіркеді.
Каратэ шеберлері де ел қоржынын алтынмен толықтырды. Жоламан Биғабыл 55 келіге дейінгі салмақта жеңімпаз атанса, Софья Берульцева 68 келіден жоғары салмақ дәрежесінде қарсылас шақ келтірмеді.
Велоспортта Қазақстан құрамасының тәжірибелі өкілі Алексей Луценко тағы бір биік белесті бағындырды. Ол Азия ойындарындағы алтын медальдарының санын алтыға жеткізіп, жеке рекордын жаңартты.
Ал Рината Сұлтанова Қазақстан әйелдер велоспорты тарихында ерекше жетістікке қол жеткізді. Ол жеке жарыста алтын медаль жеңіп алып, Азия ойындарында осы бағдарлама бойынша топ жарған алғашқы қазақстандық велошабандоз атанды.
Аралас жекпе-жек бағдарламасында да Қазақстан құрамасы үздіктер қатарынан көрінді. Еркінғали Бүркітәлі 77 келіге дейінгі салмақ дәрежесінде чемпион атанды. Сонымен қатар Қадырбек Шынбаев та ММА бәсекесінде алтын медаль жеңіп, ел қоржынына тағы бір жоғары жүлде қосты.
