89 жасқа толған әнші Нұрғали Нүсіпжанов желідегі парақшасында ерекше жазба жариялады, деп хабарлайды Malim.kz.
Ол өміріндегі төрт үлкен бақытын жеке-жеке атап өткен.
"Жазып та келем, айтып та жүрмін. Тұла бойы талантқа тұнған тау тұлғалардың тәлімін алып, тәрбиесін көрдім. Бірінші бақытым – Ахмет Жұбановтың шәкірті атанғаным. Екінші бақытым – Дінмұхаммед Қонаевтай бірегейдің ілтипатын көріп, ыждаһатпен қараған ықыласына бөлендім. Үшінші бақытым – консерваторияда оқи жүріп Шәмші Қалдаяқов әндерінің кіндігін алғаш кескен адаммын. Төртінші таудай бақытым – Нұрғиса Тілендиевпен 51 жыл дос болдым. Нұр Ағаның: "Адалым-ау, Жалғызым-ау" деп еркелеткен екі ауыз сөзі мен үшін мемлекеттік қай марапаттан да қымбат, қастерлі әрі қадірлі екенін астын сызып және бір айтқым келеді. Өміріме мән берген, сән берген асыл азаматтардың бекзат болмысына басымды иіп, мәңгілік тағзым етем. Ғұмырыма жетер ғибрат берген ұлы ұстаздарымды теңіз түбіндегі інжу-маржандарға теңер едім. Олар ғасырда бір туатын ғұламалар, өмірге екі келмейтін ғажап жандар. Мен сол ағалардың аманатын арқалап қалған адаммын", – деді ол.
Әнші жоғарыда аталған ардақты азаматтарға құрмет білдіріп, сонымен қатар аяулы жары жайлы да сөз қозғады.
"Бақытымды да, бағымды да еңбектен тапқан ермін, еліммен біргемін – жұртымның ортасындамын. Теңіз ойдың түбінен сөз маржанын терген серігім бар. Ауырғанда арқа сүйер, қиналғанда қалқан болар адамды бұйыртқан Аллаға тәубәмді қабыл алып, иманымды беріктегені үшін қарыздар қазақпын. Бүгінім үшін Аллаға шүкір етемін, болашағым үшін де Аллаға тәуекел етемін. Қара орман қазағым аман болсын, Алла-Тағаллам алты алашты іштегі даудан, сырттағы жаудан сақтағай. Менің барым да, нарым да өздеріңіз, айналайын ағайындарым, тілеулестерімді іні, қарындастарым деп қабылдаған адаммын бір сөзбен айтқанда мен халқыммен баймын", – деп жазды Нұрғали Нүсіпжанов.
