ҰБТ: гранттың 20%-ы тасқыннан зардап шеккен өңірлерге беріледі
Бірақ олар мамыр-шілде аралығындағы ҰБТ-ға қатысуға міндетті
Ұлттық тестілеу орталығы су тасқынынан зардап шеккен өңірлердің (Ақмола, Ақтөбе, Атырау, Батыс Қазақстан, Қостанай, Солтүстік Қазақстан облыстары) талапкерлері үшін маңызды ақпаратпен бөлісті, деп хабарлайды Malim.kz.
Орталықтың хабарлауынша, аталған өңір талапкерлері егер негізгі ҰБТ-дан төмен балл жинаса, онда қаңтар немесе наурыз айларындағы ҰБТ-ның жоғары нәтижелерімен грант конкурсына қатысуға мүмкіндігі бар.
Осылайша, қалауы бойынша ең үздік ҰБТ нәтижесімен грант конкурсына қатыса алады.
Мемлекеттік білім беру грантының конкурсына қатысу үшін мамыр-шілде аралығында өткізілген ҰБТ-ға қатысу міндетті. Су тасқынынан зардап шеккен аймақтың түлектері үшін мемлекеттік білім беру тапсырысының 20%-ы осы өңірлердің балаларына квота ретінде беріледі, дейді Ұлттық тестілеу орталығы директорының орынбасары Наужан Дидарбекова.
Айта кетейік, 2024 жылы жалпы грант санының 20%-ы су тасқынынан зардап шеккен өңірлердің талапкерлеріне бөлінеді. Бұл аймақтардан оқуға түсетіндер үшін грант конкурсына құжат қабылдау 13-24 шілде аралығында жүзеге асырылады.
Фото: baq.kz
