Қазақстандық фильм «Оскар» сыйлығына ұсынылды
Америка киноакадемиясының дауыс беруі үш кезеңде өтеді
Қазақстандық «Бауырына салу» деп аталатын фильм «International Feature Film» (Үздік халықаралық фильм) номинациясы бойынша «Оскар» сыйлығына ұсынылды.
Бұл туралы Мәдениет және ақпарат министрлігінің баспасөз қызметі хабарлады.
Режиссер Асхат Кучинчерековтың «Бауырына салу» фильмі әжесінің қолында өскен жеткіншектің оқиғасын баяндайды. Әжесі қайтыс болғаннан кейін ол өзінің ата-анасына оралуға және жаңа ортада өзіне бөтен адамдармен қарым-қатынас құруға мәжбүр болады. Режиссердің айтуынша, бұл туынды – қазақ халқының салт-дәстүріне деген ерекше құрмет.
Бұған дейін аталмыш картина Қазақстан кинематографистер альянсы мүшелерінің дауыс беру қорытындысы бойынша «Тұлпар» ұлттық кино сыйлығының ең жоғары наградасына ие болған. Енді Оскар комитетіне елді халықаралық аренада таныстыру үшін ұсынылмақ.
Америка киноакадемиясының дауыс беруі үш кезеңде өтеді. 9-13 желтоқсан аралығында 17 желтоқсанда жарияланатын қысқа тізім таңдалады. Келесі кезең 2025 жылдың 8-12 қаңтары аралығында өтеді. Ол кезде қысқа тізім бойынша дауыс береді. Барлық санаттағы үміткерлер 17 қаңтарда жарияланады. Дауыс берудің соңғы кезеңі 11-18 ақпан аралығына жоспарланған.
Фото: 98mag.kz
