№137 мектептің жағдайымен танысуға барған Шымкент қаласының әкімі Мұрат Әйтенов төртінші тоқсанындағы оқу үрдісін ұйымдастыру мәселелерімен танысты.

Қалалық білім басқармасының басшысы Жанат Тәжиеваның айтуынша,  жалпы білім беретін мектептерде барлық сынып оқушылары үшін бала санын 25 адамнан асырмай аралас форматта оқытылмақ.

Контингенті 300 оқушыға дейінгі мектептерде сыныптардағы балалар санын 25 адамнан аспай дәстүрлі форматта оқиды. Білім беру ұйымы әкімшілігінің шешімі бойынша сабақтан тыс уақытта 15 адамнан аспайтын топтарда оқушыларды жеке оқытуға болады.

-Білім беру нысандары «InfoKazakhstan.kz» порталына тіркеліп, Денсаулық сақтау министрінің бұйрығының талаптарын сақтаған кезде білім беру объектілеріндегі қоғамдық тамақтандыру қызметіне рұқсат беріледі. Тағы бір айта кетерлігі, оқушыларға мектепке міндетті мектеп формасында емес, еркін, ұқыпты және жинақы киімде болуға рұқсат етіледі. Ата-аналарға мектеп формасын сатып алудың қажеті жоқ, - деді сала басшысы.

Мұрат Әйтенов білім беру ісінде санитариялық-эпидемиологиялық талаптардың сақталуы, бала қауіпсіздігі мен денсаулығын сақтауда барлық жағдайларды қамтамасыз етілуі қажет деді. Сондай-ақ, ата-аналар  балаларға жеке тазалықты сақтау мен әлеуметтік қашықтықты сақтау жайын үнемі түсіндіріп отыруы тиістігін айтты.