Өрт кезінде алгоритм жұмыс істемеді – Бектенов кінәлілерді жазалауды тапсырды

Премьер-министр Олжас Бектенов өрт сөндіру алгоритмін орындамау деректері бойынша тергеу жүргізуді тапсырды, - Malim.kz тілшісі.

Үкімет басшысының айтуынша, Қазақстанда өртке жедел әрекет ету үшін жаңа іс-қимыл алгоритмі әзірленген. Алайда Павлодар және Абай облыстарындағы алғашқы табиғи өрттер бұл алгоритмнің орындалмағанын көрсетті.

"Абай облысында орман мекемелерінің қызметкерлері болған өрт туралы ТЖМ, ІІМ және Қорғаныс министрлігін дер кезінде хабардар етпеген", – деді ол.

Бектеновтің айтуынша, Павлодар облысында да ұқсас жағдай болған.

"Экология министрлігіне, Төтенше жағдайлар министрлігіне және Ішкі істер министрлігіне екі өңірдегі өрт деректері бойынша тергеу жүргізуді, тиісті шаралар қабылдап, кінәлілерді жазалауды тапсырамын", – деді премьер-министр.

Үкімет басшысы атап өткендей, жүргізілген тексерулер табиғи өрттердің алдын алу және жою бойынша іс-шаралар жоспары барлық өңірде тиісті деңгейде жүзеге аспай жатқанын көрсетті.

"Осыған байланысты өңір әкімдеріне өрт қауіпті маусымға дайындық жұмыстарын жандандыруды және бұл мәселені жеке бақылауға алуды тапсырамын", – деп мәлімдеді Бектенов.

Еске салайық, бұған дейін Астанада алты қабатты жатақханада өрт болған. Құтқарушылар ғимараттан 50 адамды, оның ішінде 7 баланы эвакуациялаған.

Сондай-ақ, Абай облысы Бесқарағай ауданының ауылдық округі аумағында табиғи өрт шыққаны хабарланған. Қоянбай ауылында құрғақ шөп жанып, жалын орман алқабына таралған.

Фото: Pixabay.com