Қай облыстарда су тасқыны болуы мүмкін?

Төтенше жағдайлар вице-министрі Кеген Тұсынбаев Үкіметтегі брифингте су тасқынының келесі кезеңі қай облыстарда күтілетінін айтты, - деп хабарлайды Malim.kz тілшісі.

"Су тасқынының келесі кезеңі Солтүстік және Шығыс Қазақстан облыстарында күтіледі. Бұл өңірлердегі алдын алу шаралары қарқынды жүргізіліп жатыр. Күштер мен құралдар резерві, оның ішінде әскери бөлімдер алдын ала жіберілді. Жағдайды бақылауда ұстаудамыз, күштер мен құралдар қосымша жөнелтуге дайын тұр", - деді Төтенше жағдайлар вице-министрі.

Оның айтуынша, су тасқыны кезеңі басталғаннан бері елде шамамен 4,3 млн текше метр су сорылды. 600 мыңнан аса құм салынған қаптар төселіп, сегіз жүз шақырымнан астам арық тазартылды. Сонымен қатар, алдын ала 383 адам эвакуацияланды.

"51 мыңнан астам мал қауіпсіз орындарға айдалды, барлығы кері қайтарылды. Автомобиль жолдарын су шайған 176 жағдай мен су жырып өткен 25 учаске тіркелді. Қазір бақылауда тұрған 21 автожол мен су жырып өткен 5 учаске бар", - деп мәлімдеді Кеген Тұсынбаев.

Фото: Pixabay.com