Әнші Жанар Айжанова жеке өміріне қатысты сырын бөлісті. Өнер иесі "Momsкий әңгіме" YouTube арнасына берген сұхбатында күйеуі өмірден өткеннен кейін екінші рет тұрмысқа шыққанын және ол некеде 20 жыл өмір сүргенін айтты, деп хабарлайды Malim.kz.
Әншінің сөзінше, жас кезде құрылған отбасының орны бөлек. Ол екінші некесінде перзент сүйгісі келгенін, қызы Айжұлдыздан кейін тағы да балалы болуды армандағанын жасырмады.
"Негізі, ізін суытпай тұрмысқа шығып кеткен жақсы. Жас кезіңде құрған тұрмыс бөлек. Онымен үйлесесің бе, үйлеспейсің бе, әйтеуір баладан көбі үйлесіп кетіп жатады. Артынан тұрмысқа шықтым, тұрмысқа шыққанмен бермейтін Құдай бермейді екен. Айжұлдыздан кейін сонша дәмеленгенмін. Қыз болса да, ұл болса да, әйтеуір жалғыз болмаса екен деп. Бұйырмады. Болмайтын нәрсеге аспанға балта шаппаймыз ғой", – деді Жанар Айжанова.
Сондай-ақ өнер иесі екінші жұбайымен ажырасу себебіне де тоқталды. Оның айтуынша, олар Айжұлдыз тұрмысқа шыққаннан кейін екі бөлек кеткен.
"Мен екінші тұрмыста 20 жыл тұрдым. Айжұлдыз тұрмысқа шыққаннан кейін екі жаққа кеттік. Өзім де соны ойлап жүргенмін, арамызда бала болмады. Ол біреудің баласы. Бала болса да, болмаса да, біздер әйелден көреміз ғой. Обалына қалмайын деп бір күнде шешіп, екі жаққа кеттік", – деді әнші.
Жанар Айжанова бұрынғы жұбайына ренішінің жоқ екенін айтып, оған әлі де жақсылық тілейтінін жеткізді. Әнші экс-күйеуінің балалы болғанын қалайтынын да айтты.
“"0 жыл бірге тұрдық, бала болмады. Менен анау да көреді, мынау да көреді. Ол кісі балалы болса екен деп тілеймін, әлі тілеп жүрмін", – деді өнер иесі.
Еске сала кетейік, Жанар Айжанованың қызы Айжұлдыз Адайбекова жаңадан туған екінші ұлына қандай есім қойғанын жариялаған.
Жанар Айжанова кім?
Жанар Мерғалиқызы Айжанова – қазақ эстрадасында өзіндік орны бар әнші, айтыскер әрі актриса. Ол 1968 жылы 6 ақпанда Ақтөбе облысы Шалқар ауданы Тұмалыкөл ауылында дүниеге келген. Балалық шағы ауылда өтіп, мектеп кезінен музыкаға, сахнаға және ән айтуға жақын болды.
Ашық деректерде оның өнерге келуіне анасының ықпалы болғаны айтылады. 1995 жылы қазіргі Абай атындағы Қазақ ұлттық педагогикалық университетінің музыка факультетін бітірген. Кәсіби сахнада ол халық әндерін, эстрадалық шығармаларды және әзіл-сықаққа жақын сахналық нөмірлерді орындауымен танылды. Жанар Айжанова кең тынысты дауысы, еркін мінезі және көрерменмен тез тіл табысатын табиғи болмысымен ерекшеленеді. Ол әншілікпен қатар айтыс өнеріне де жақын болып, қазақы қалжың мен шешендікке құрылған образдарымен көпшілікке танылды. Кейінгі жылдары өнер иесі тележобалар мен түрлі ойын-сауық бағдарламаларына жиі қатысып, халық арасындағы танымалдығын сақтап келеді.
Жанар Айжанова кино мен сериалдарда да бой көрсетіп, актриса ретінде бірнеше жобада ойнаған. Көрермен оны әсіресе комедиялық бағыттағы рөлдері арқылы жақсы таниды. Ашық деректерде оның "Аппақ келін", "Bizdin show" сияқты жобаларға қатысқаны көрсетілген. Өнер иесі шығармашылық жолында сахнадағы шынайылығы мен қарапайым болмысының арқасында өз тыңдарманын қалыптастырды.
Жанар Айжанова – жеке өмірі де көпшіліктің назарында жүретін танымал тұлғалардың бірі. Оның Айжұлдыз есімді қызы бар. Айжұлдыз Адайбекова да көпшілікке актриса, модель және дизайнер ретінде белгілі. Әнші сұхбаттарында өміріндегі қиын кезеңдер, отбасы, ана болу және тағдыр туралы ашық айтып келеді. Жанар Айжанова 2020 жылы Қазақстанның еңбек сіңірген қайраткері атағын алғаны көрсетіледі. Бүгінде ол ел ішінде әнші ғана емес, мінезі ашық, сөзі өткір, халыққа жақын өнер адамы ретінде танылған. Оның өмір жолы ауылдан шыққан қарапайым қыздың табандылық, талант және еңбек арқылы қазақ өнеріндегі танымал тұлғаға айналғанын көрсетеді.
