Қазақстан Үкіметі мерекелік күндер тізбесіне жаңа толықтыру енгізді, деп хабарлайды Malim.kz.
Енді жыл сайын 3 қыркүйек – Қазақ тазысы мен төбеті күні ретінде атап өтіледі. Тиісті қаулы 2026 жылғы 28 сәуірден бастап күшіне енеді.
Тазы мен төбет – қазақтың ежелден келе жатқан ит тұқымдары. Тазы – аңшылыққа бейім, шапшаң әрі сезімтал ит болса, төбет – мал мен мүлікті күзететін ірі, сақ тұқым. Екеуі де қазақ мәдениетіндегі «Жеті қазынаның» бірі саналады.
Жаңа мереке аясында елімізде түрлі танымдық іс-шаралар, көрмелер, дәрістер мен семинарлар өткізу жоспарланып отыр. Бұл бастама тазы мен төбет тұқымдары туралы қоғамның білімін арттыруға және оларды кеңінен насихаттауға бағытталған.
Сондай-ақ мереке кинологиялық ұйымдар мен ит өсірушілерге тәжірибе алмасуға, жарыстар мен көрмелерге қатысуға қосымша мүмкіндік береді.
Айта кетейік, 2024 жылғы 3 қыркүйекте Амстердамда қазақ тазысы тұқымын алдын ала тану туралы шешім қабылданып, Қазақстан стандарт иесі ретінде бекітілген. Толық халықаралық тану 2034 жылдан кейін белгілі болмақ.
