Түрік үкіметі мектеп оқушыларының бір апталық көктемгі және күзгі демалыстарын алып тастау мәселесін қарастырып жатыр. Бұл туралы елдің білім министрі Юсуф Текин ескерту жасады, деп хабарлайды Malim.kz.
2019 жылға дейін Түркия мектептері дәстүрлі екі семестрлік оқу жүйесімен жұмыс істеген. Ол кезде оқушылар тек қысқы және жазғы каникул алған. Кейін билік жазғы демалыстың "өте ұзақ болып, оқушылар оқу материалын ұмытып үлгереді" деген уәжбен мерзімін қысқартып, оның орнына көктемгі және күзгі үзілістерді енгізген еді.
Алайда министрдің айтуынша, соңғы жылдары ата-аналардан шағым көбейген. Оқушылар қысқа демалыстан кейін мектепке оралғысы келмей, қайта бейімделу процесі қиындай түскен.
Осы себепті министрлік каникул жүйесіне қайта талдау жасап, көктемгі және күзгі демалыстарды толық алып тастау мүмкіндігін қарастыра бастады. Әзірге түпкілікті шешім қабылданған жоқ.
