Украина президенті Владимир Зеленский Ирландияға сапармен барған кезде оның ұшағының қасында белгісіз дрондар ілесе ұшқан. Бұл ақпаратты ирландиялық БАҚ таратқан еді, ал 5 желтоқсанда Украинаның Президенті кеңесшісі Дмитрий Литвин оны ресми түрде растады, деп хабарлайды Malim.kz.
«Қауіпсіздікке қабылдаушы тарап жауапты. Олардың дерегінше, мұндай дрондар шынында да болған, алайда бұл жайт сапарға әсер еткен жоқ және ешқандай өзгеріс енгізуді талап етпеді», – деді Литвин.
Ирландиялық The Journal басылымының мәліметінше, Зеленский мінген ұшақ 1 желтоқсанда Дублинге қонар алдында оған төрт белгісіз дрон жақындаған.
Дереккөздер бұл дрондардың Ирландия астанасының солтүстік-шығыс бағытынан көтеріліп, президенттік борттың қасынан өткенін және біраз уақыт бойы жасырын жағдайда теңізге шығарылған Ирландия Әскери-теңіз күштерінің кемесінің үстінде қалықтап тұрғанын хабарлаған. Билік әуе шабуылына қарсы қорғаныс құралдарын қолданбаған, ал кемедегі қару-жарақ дрондарды жоюға жеткіліксіз болған. Патрульдік жойғыш ұшақтар да араласпаған.
Белгісіз дрондар туралы The Irish Times газеті де жазды. Басылымның мәліметінше, Ирландия ӘТК кемесі Украина президентінің ұшағының бағытына жақын маңда ұшқан бес дронды анықтаған. The Irish Times дерегінше, дрондар Дублиннің Хоут атты маңайында, Зеленскийдің ұшағы сол аумақтың үстімен ұшуы тиіс кезде пайда болған. «Алайда оның ұшағы сәл ертерек келген. Дереккөздердің айтуынша, ешқандай қауіп болмаған», – делінген материалда.
Ирландия полициясы дрондардың жерден ұшырылғанын не жақын маңдағы кемеден жіберілгенін анықтап жатыр. Тергеуге елдің Әділет министрлігі мен Қорғаныс министрлігі де қосылды. Куәгерлердің айтуынша, дрондар әскери үлгідегі аппараттарға ұқсап көрінген. Украина президенті сапармен келген кезде Дублин әуежайы маңы ұшу-қонуға тыйым салынған аймақ болып жарияланған. Зеленскийдің Ирландия басшылығымен және депутаттарымен кездесулері оқыс оқиғаларсыз өтті.
Күзде Еуропаның Дания, Швеция, Германия, Бельгия, Польша және Румыния секілді елдерінде, сондай-ақ НАТО базаларының маңында белгісіз дрондардың пайда болуы бірнеше рет тіркелген еді. Зеленский мұндай арандатулардың артында Ресей тұр деп мәлімдеп, дрондарды «көлеңкелі флот» танкерлерінен ұшыруы мүмкін екенін айтқан. Ол Батыс елдерін Балтық және өзге де теңіздерді ресейлік кемелер үшін жабуға және оларды қатаң санкциялармен шектеуге шақырған.
