708 млн теңге. «Балқаш жылу» директорының бұрынғы орынбасары мен бас бухгалтері сотталды
Бюджет қаражатын жалған кәсіпорындардың шоттарына негізсіз аударған
«Балқаш Жылу» ЖШС директорының бұрынғы орынбасары және кәсіпорынның бас бухгалтері бюджет қаражатын ұрлағаны үшін сотталды, деп хабарлайды Қаржылық маниторинг агенттігінің баспасөз қызметі.
Аталған азаматтарға қатысты қылмыстық істі агенттік тергеп-тексерді.
Сотталған азаматтар 2020 жылғы маусым мен 2023 жылғы қаңтар аралығында Балқаш ЖЭО мен Балқаш қаласын жылумен жабдықтау желілерін жөндеуге және жұмысын үздіксіз қамтамасыз етуге арналған бюджет қаражатын іс жүзінде қандай да бір азаматтық-құқықтық мәмілелер жасалмаған жалған кәсіпорындардың шоттарына негізсіз аудару жолымен ұрлаған.
Жалпы сомасы 708 млн теңге болатын ұрланған қаражат оны пайдаланудан кіріс алу үшін жылжымайтын мүлікпен мәмілелер жасау арқылы заңдастырылды.
Тергеу барысында күдіктілер 144 млн теңгені ақшалай қайтарды.
Кінәлі адамдарды сот 5,5 жыл және 5 жыл бас бостандығынан айырды. Сот үкімі заңды күшіне енген жоқ. Мемлекет кірісіне 3 бөлмелі пәтер мен Lexus автокөлігі тәркіленіп алынды.
Фото: Zakon.kz
