Көкшетау қаласының полиция басқармасы осыдан екі жыл бұрын қылмыс жасағандарды ұстады. Олар 2 мыңға жуық сыра кегін ұрлаған, деп хабарлайды Malim.kz.
Оқиға желісі бойынша, 2022 жылғы 7 шілдеде Көкшетау қаласының полиция басқармасына облыстық орталық кәсіпорындарының бірінің бухгалтерінен ұйым қоймасынан белгісіз тұлғалардың 2 мыңға жуық сыра кегін ұрлағаны туралы арыз түседі. Залал көлемі 65 млн 600 мың теңге.
Тергеу барысында 2022 жылдың 31 қаңтары мен 16 наурызы аралығында зиянкестер кілттерді таңдау арқылы кәсіпорынның қоймасына кіріп, тауарды жүк көлігімен бөлшектеп әкеткені анықталды, деп жазылған полиция хабарламасында.
Осы қылмысты жасағаны үшін тергеу және арнайы жедел-іздестіру іс-шараларын жүргізу барысында Ақмола облысы ПД Криминалдық полиция басқармасының қызметкерлері күдіктілерді ұстаған. Олар Зеренді ауданының 41 жастағы тұрғыны және бұрын қылмыстық жауапкершілікке тартылған Көкшетау қаласының 30 және 40 жастағы екі тұрғыны болып шықты.
Белгілі болғаны, қылмыстық жолмен алған өнімді қаскүнемдер елордаға жеткізіп, ұрланған тауарды жақын шетелге экспорттағаны.
Ұрлық фактісіне қатысты ҚК 188-бабының 4-бөлігі – «Ұрлық» бабы бойынша сотқа дейінгі тергеу жүріп жатыр.
Фото: gov.kz
MalimBlocks
