Қаржылық мониторинг агенттігі Шымкент қаласы бойынша департаменті қылмыстық кірістерді жасыру және заңдастыру схемасын анықтады. Ол суррогаттық алкоголь өнімдерін өндіретін жасырын цех қызметінен түскен, деп хабарлайды Malim.kz.
Тергеу барысында 2022 жылдан бастап ерлі-зайыпты Қарсеновтар қолдан жасалған акциздік маркаларын және этил спиртін пайдаланып, заңсыз алкоголь өнімдерін өндіруді ұйымдастырғаны белгілі болған.
Өнім Шымкент қаласында ғана емес, сондай-ақ, көршілес Түркістан және Жамбыл облыстарында да сатылған.
Тінту барысында 9 мың литрден астам этил спирті, 24 мыңнан астам жалған акциз маркасы, әр түрлі маркалы дайын алкоголь өнімі және 75 млн теңге көлемінде ақшалай қаражат тәркіленді. «Follow the money» принципі бойынша жүргізілген қаржылық тергеу нәтижесінде жасырын цехтың 309 млн теңгеден астам сомадағы барлық қылмыстық кірістері анықталды, деп жазылған агенттік мәліметінде.
Қылмыстық жолмен алынған қаражатқа күдіктілер жалпы құны 234 млн тенгені құрайтын 13 қымбат көлік («Toyota Land Cruiser 300», «ZEEKR 001», «KIA K8», «Hyundai Grandeur», «VOLVO» және т.б.) сатып алған, тәркілеуден жасыру мақсатында олардың бір бөлігін жақын туыстарына рәсімдеген.
Сот үкімімен аталған тұлғалар заңсыз кәсіпкерлік (ҚК 214-бабының 2-бөлігі, 2-тармағы), акцизделетін тауарлардың таңбалау тәртібі мен ережелерін бұзу (ҚК 233-бабының 2-бөлігі), қылмыстық жолмен алынған ақша мен мүлікті заңдастыру (ҚК 218-бабының 3-бөлігі, 3-тармағы) бойынша кінәлі деп танылған.
Сот оларға 5 және 6 жылға бас бостандығынан айыру жазасын тағайындаған. Мемлекет кірісіне қылмыстық жолмен тапқан қаражатқа сатып алынған 13 көлік пен 75 миллион теңге тәркіленген.
Фото: видеодан скриншот
Байланысты жаналықтар
MalimBlocks
