Қазақ эстрадасының аңыз тұлғасы, Қазақстанның Халық әртісі Роза Рымбаева журналист Тимур Балымбетовке берген сұхбатында бұрын көпшілікке беймәлім болып келген шындықты ашық айтты, деп хабарлайды Malim.kz.
Әнші өзінің сахнадағы шығармашылығына 50 жыл толуына орай түсірілген деректі фильм барысында бір кезеңде жоғары лауазымды министр тарапынан әділетсіздік көргенін жасырмады.
"Иә, ондай министр болды. Мен кейбір нәрселерге бей-жай қарай алмаймын. Мәселен ол жерде әділетсіз болса, көз жұма қарай алмаймын. Мен үлкен адаммын, кішкентай қыз емеспін ғой. Менің сахнада жүргеніме 50 жыл болды, жасым туралы айтпай-ақ қояйын. Мен өз жолымды тапқан ересек адам ретінде оған құқығым бар деп есептеймін. Неге мен өз пікірімді айтпай, бұғып қалуым мүмкін? Неге мен айтпауым керек? Мен ешкімді сырттай жамандап жатқаным жоқ, бәрін бетке айтамын, ондай адам ешкімге ұнамайды", – деді ол.
Роза Рымбаева туралы
Роза Рымбаева – қазақ эстрадасының ең көрнекті өкілдерінің бірі, Қазақстанның Халық әртісі, профессор, актриса әрі тележүргізуші. Ол 1957 жылы 28 қазанда Шығыс Қазақстан облысы Жарма ауданындағы Жаңғызтөбе станциясында дүниеге келген. Өнер жолындағы белсенділігі 1975 жылдан басталып, бүгінге дейін жалғасып келеді.
Роза Рымбаева кәсіби білімін Семей музыкалық училищесінде, кейін Алматыдағы театр-көркемөнер институтында алған. 1970-жылдардың ортасында "Гүлдер" ансамблінің солисі ретінде танылып, 1977 жылы Болгарияда өткен "Алтын Орфей" халықаралық байқауында Гран-при иеленуі оның шығармашылығындағы үлкен серпіліс болды. Кейін "Арай" ансамблінің солисі ретінде қазақ эстрадасының алтын қорына енген көптеген әндерді орындады.
Әншінің орындауындағы "Әлия", "Атамекен", "Айгөлек", "Куә бол", "Гүлдене бер, туған жер" сияқты әндер бірнеше буын тыңдарманның жүрегінен орын алды. Ол халық әндерін де, заманауи поп және джаз бағытындағы шығармаларды да өзіндік мәнермен орындай білді. Сонымен қатар киноактриса ретінде де бірқатар фильмдерге түскен.
Роза Рымбаева – халықаралық байқаулардың бірнеше дүркін жеңімпазы. 29 жасында Қазақстанның Халық әртісі атағын алған ол "Парасат", "Құрмет", "Халықтар Достығы" ордендерімен және Қазақстан Республикасының Мемлекеттік сыйлығымен марапатталған. Өнердегі ұзақ жолында ол "Қазақ примадоннасы", "Қазақстанның Алтын дауысы", "Орта Азия бұлбұлы" деген бейресми атақтарға ие болды.
