Талғар ауданында Денсаулық сақтау министрімен өткен кездесуде Алматы облысы әкімінің бірінші орынбасары Қанат Есболатовтың мүгедектігі бар азаматтарға қатысты айтқан сөзі қоғамда үлкен резонанс тудырды, деп хабарлайды Malim.kz.
Қоғамдық сын күшейгеннен кейін облыс әкімінің орынбасары оқиғаға байланысты түсініктеме берді. Оның айтуынша, кездесуге халық көп жиналып, әрқайсысы өз сұрағын айтуға тырысқандықтан, кезек баяу жылжыған.
– Денсаулық сақтау министрінің қабылдауына адам өте көп келді. Барлығы сұрақ қойғысы келді, сол себепті кезек ұзап кетті, – деді Есболатов.
Ол жиын төрт сағатқа созылғанын, залда мүгедектігі бар адамдардың да болғанын айтты. Есболатов тәртіпке шақыру мақсатында ескерту жасағанын, алайда орыс тілінде айтқан сөзінде қателік кеткенін мойындады.
– Регламентті сақтауға шақырдым. Бірақ орысша айтқан сөзім дұрыс шықпай қалды. «Құдай сынақ берген» деген ойды жеткізгім келген еді. Сөзімнің көпшіліктің көңіліне тигенін түсіндім. Сол үшін шынайы түрде кешірім сұраймын, – деп жазды ол.
Айта кетейік, Қанат Болатұлы Есболатов 1982 жылы дүниеге келген. Жоғары білімі бар. 2008 жылы Қазақ ұлттық аграрлық университетін «Мемлекеттік және жергілікті басқару» мамандығы бойынша аяқтаған.
Еңбек жолын 2002 жылы «Досанов» шаруа қожалығында төрағаның орынбасары ретінде бастаған. Әр жылдары Еңбекшіқазақ ауданы бойынша Алматы облысының қаржы басқармасында инспектор, бас инспектор және аға инспектор, «Megaron & K» ЖШС-інде қаржы директоры, Жетісу облысы Ескелді ауданы Көкжазық ауылдық округінің әкімі қызметтерін атқарған. Сондай-ақ Ескелді ауданы әкімінің орынбасары, Алматы облысының ауыл шаруашылығы басқармасы басшысының орынбасары және басшысы, Жетісу облысының ауыл шаруашылығы басқармасының басшысы лауазымдарында жұмыс істеді.
2022 жылдың қыркүйегінен бастап Жетісу облысының Кербұлақ ауданының әкімі қызметін атқарған.
Алматы облысы әкімінің өкімімен 2025 жылғы 3 қарашадан бастап Алматы облысы әкімінің бірінші орынбасары болып тағайындалды.
