Биньямин Нетаньяху АҚШ ұсынған Газаға арналған «Бейбітшілік кеңесінің» құрамы Израильмен келісілмегенін мәлімдеді, деп хабарлайды Malim.kz. DW-ге сілтеме жасап.
Ал АҚШ-тың жоғары лауазымды шенеунігі бұл мәлімдемеге: «Бұл – біздің шоуымыз» деп жауап берді.
Израиль үкіметі АҚШ-тың Газа секторын әкімшілік басқаруға арналған орган құру бастамасы ел билігімен келісілмегенін және Израильдің мемлекеттік саясатына қайшы келетінін хабарлады. Бұл туралы сенбі, 17 қаңтарда премьер-министр кеңсесінің X әлеуметтік желісінде жарияланған мәлімдемеде айтылды.
The Times of Israel басылымының жазуынша, мұндай реакцияға Түркияның сыртқы істер министрі **Хакан Фидан**ның АҚШ президенті Дональд Трамп ұсынған Газа бойынша бейбіт жоспар аясында құрылатын органдардың біріне енуі себеп болған. Бұған дейін Фидан Израиль үкіметін және оның Газадағы соғыс жүргізу тәсілдерін бірнеше рет сынға алған.
«Газа секторы үшін Бейбітшілік кеңесі» үш орган құруды көздейді. Бұған дейін Ақ үй Газа секторына арналған «Бейбітшілік кеңесінің» құрамын жариялаған болатын. Бұл орган Трамптың палестина-израиль қақтығысын реттеу жоспары аясында құрылады. Кеңес төрағасы ретінде АҚШ президентінің өзі тағайындалады.
Кеңес құрамына сондай-ақ АҚШ мемлекеттік хатшысы Марко Рубио, президенттің арнайы өкілі Стивен Уиткофф, Трамптың күйеу баласы Джаред Кушнер, Ұлыбританияның бұрынғы премьер-министрі Тони Блэр, америкалық кәсіпкер Марк Роуэн, Дүниежүзілік банк басшысы Аджай Банга, сондай-ақ АҚШ-тың ұлттық қауіпсіздік жөніндегі кеңесшісінің орынбасары Роберт Гэбриэл кіреді.
Сонымен қатар Ақ үй «Бейбітшілік кеңесі тұжырымдамасын іске асыру» үшін жеке Атқарушы кеңес құрылғанын хабарлады. Ондағы негізгі рөлді болгариялық дипломат, БҰҰ-ның Таяу Шығыс жөніндегі бұрынғы арнайы өкілі Николай Младенов атқарады. Ол «Бейбітшілік кеңесі» мен Газа секторын басқару жөніндегі Ұлттық комитет арасындағы байланысты қамтамасыз етеді.
Израиль билігінің сынына ұшыраған Хакан Фидан дәл осы Атқарушы кеңестің мүшесі болады. Бұл органға сондай-ақ Уиткофф, Кушнер, Блэр, Роуэн, катарлық дипломат Али аль-Тавади, кипрлік-израильдік кәсіпкер Якир Габай, БАӘ-нің халықаралық ынтымақтастық жөніндегі министрі Рим аль-Хашими және басқа тұлғалар енді.
Ал Газа секторын басқару жөніндегі Ұлттық комитетті бұрын Палестина ұлттық әкімшілігінде жоғары қызметтер атқарған Али Шаас басқарады. Ақ үй мәлімдемесіне сәйкес, бұл комитет «азаматтық институттарды қалпына келтірумен және Газадағы күнделікті өмірді тұрақтандырумен» айналысады.
