Алматы облысында әскери тікұшақ жоғалып кетті
Алматы облысында әскери тікұшақ радардан жоғалып кетті. Оқиғаға қатысты Қорғаныс министрлігі түсініктеме берді, деп хабарлайды Malim.kz.
Қорғаныс министрлігінің мәліметіне сүйенсек, 2025 жылғы 25 шілдеде Алматы облысында жоспарлы ұшу барысында Қазақстан Республикасы Қарулы Күштері Әуе қорғанысы күштерінің EC-145 тікұшағы радардан жоғалып кетті.
«Алдын ала мәлімет бойынша, тікұшақ бортында үш экипаж мүшесі болған. Оқиға орнына Қорғаныс министрлігі мен ТЖД-ның күштері мен құралдары жұмылдырылып, іздестіру-құтқару жұмыстары жүріп жатыр.
Қазақстан Республикасы Қорғаныс министрінің тапсырмасы бойынша оқиғаның мән-жайын анықтау үшін арнайы комиссия аттанды.
Қосымша ақпарат оқиғаны анықтау барысы бойынша беріледі», – делінген ведомство хабарламасында.
Оқиғаға қатысты Төтенше жағдайлар министрлігі де түсініктеме беріп өтті.
«25 шілдеде Алматы облысының ТЖД кезекші бөліміне үш экипаж мүшесі бар Қорғаныс министрлігінің тікұшағы Луговой елді мекенінен ұшып шығып, Отар аумағында байланысқа шықпай қалғаны туралы хабар түсті.
Оқиға орнына дереу ҚР ТЖМ-нің күштері мен құралдары, соның ішінде "Қазавиақұтқарудың" 2 тікұшағы жұмылдырылды.
Іздестіру-құтқару жұмыстарына ТЖМ бөлімшелері, Апаттар медицинасы орталығы, Республикалық жедел-құтқару жасағы мен ТЖМ авиациясы жұмылдырылды. Барлығы 100-ден астам адам мен 15-ке жуық бірлік техника, оның ішінде авиация мен ұшқышсыз ұшу аппараттары тартылды.
Іздестіру-құтқару жұмыстары жалғасып жатыр», – делінген ҚР ТЖМ хабарламасында.
Фото: Қорғаныс министрлігі
Ең көп оқылған
