LRT құрылысындағы ұрлық ісі бойынша күдіктілердің бірінің қайда екенін анықталды
Интерпол LRT құрылысындағы ұрлық ісі бойынша күдіктілердің бірінің қайда екенін анықтады
Халықаралық тергеушілер атышулы LRT ісі бойынша күдіктілердің бірінің орналасқан жерін анықтады. Бұл туралы Астана қалалық прокуратурасы мәлімдеді, - деп хабарлайды Malim.kz тілшісі КТК телеарнасына сілтеме жасап.
Алайда нақты кім анықталғаны қадағалаушы орган тарапынан нақтыланбады.
«Интерполдың мәліметінше, қылмыстық іс фигуранттарының бірі қазір Батыс елдерінің бірінде екені анықталды. Жалпы экстрадиция бойынша да бірқатар іс-шара жүргізіліп жатыр», - деді Астана прокурорының орынбасары Азамат Ермаханов.
Бұл ақпаратты Айжан Аймағанова Instagram парақшасында жариялады. Ол – Қуандық Бишімбаевтың ісін жүргізіп, сотта Салтанат Нүкенованың өліміне оның қатысы барын дәлелдеген прокурор.
Еске салайық, Астанадағы жерүсті метросын салу кезіндегі ұрлық деректері бойынша тергеу бес жыл бұрын аяқталған. Осы уақыт бойы басты күдіктілер – «Астана LRT» компаниясының бұрынғы басшысы Талғат Ардан және Астана қаласы әкімінің бұрынғы орынбасары Қанат Сұлтанбеков – халықаралық іздеуде болған. Олардың қайсысы табылғаны әзірге белгісіз.
Фото: Halyq Uni
