Шу ауданындағы ана мен бала өліміне дәрігерлер кінәлі - комиссия

Жамбыл облысы Шу ауданындағы орталық ауруханада болған ана мен бала өліміне дәрігерлер кінәлі. Арнайы комиссия жүкті әйел акушерлердің салғырттығынан қайтыс болды деген қорытынды шығарды, - деп хабарлайды Malim.kz тілшісі КТК арнасына сілтеме жасап. 
Шу ауданындағы қайғылы жағдайдан соң өрескел қателікке жол берген жауаптылар жазаланды. Денсаулық сақтау министрлігі жүргізген тексерістен кейін бес лауазымды қызметкерге қатаң шара қолданылған. Ең алдымен Шу аудандық орталық ауруханасының бас дәрігері қызметінен босатылды. Оның орынбасарына да қатаң сөгіс беріліп, босандыру бөлімінің басшысы жұмыстан қуылды. Сондай-ақ облыстық денсаулық сақтау басқармасы басшысының міндетін атқарушы мен ана мен бала денсаулығын қорғау бөлімінің басшысы да қатаң сөгіс алған.

Дәрігерлер 25 жастағы Әдемі Ешеналиеваның денесі ісіп бара жатқанына мән бермеген. Сондай-ақ зәр мөлшерінің шамадан тыс төмендегенін тексермепті. Соның салдарынан науқастың қан қысымы 170-ке дейін көтеріліп кеткен. Сәбиінен айырылған ана 12 күн бойы ес-түссіз комада жатып көз жұмды.

"Құлаған кезде бала шетінеді. Құлап, қан қысымы көтеріліп, әйел есінен айырылды. есін жоғалтты. Тексеріп, консилиум жасап, оны үшінші дәрежедегі облыстық перинатал орталыққа жіберу керек еді", - деді Жамбыл облысы денсаулық сақтау басқарма басшысы орынбасарының міндетін атқарушы Қаракөз Сағынғалиева. 

Еске салайық, бұған дейін Жамбыл облысында ер адам жүкті әйелінің мүрдесін перзентхананың жертөлесінен тауып алғанын жазған едік. 

Фото: Pixabay.com