Жамбыл облысында ер адам жүкті әйелінің мүрдесін перзентхананың жертөлесінен тауып алған

Жамбыл облысында жүкті әйел жұмбақ жағдайда көз жұмды, - деп хабарлайды Malim.kz тілшісі Информбюроға сілтеме жасап. 

Жақындарының айтуынша, дәрігерлер 25 жастағы ананың мәйітін, қойма ішіне жасырып қойған. Бұл оқиға Шу аудандық көпбиінді орталық ауруханасында болған. Науқастың қалай, қандай жағдайда қайтыс болғаны белгісіз. Өйткені ауыр жағдайда ауруханаға жеткізілген Әдемі Ешеналиеваны ақ халаттылар әжетхана ішінде ес түссіз күйде жатқанда көрген. 

Оқиғаның мән-жайы

Әйел күйеуіне жолдаған соңғы хабарламасында ауруханадан гөрі халық еміне жүгінейік деп жалынған. Бірақ ауруханадағылар "ол жансақтау бөлімінде жатыр" деп ешкімді жуытпаған. Туыстары мәйітхананы да барып тексерген, онда табылмаған әйелдің мүрдесін дәліздегі қуыс қоймадан тапқан. Жарты айдан бері дәрігерлердің бақылауында болған Әдемі Ешеналиеваға еш ем қонбады дейді. Бесінші күні жағдай ушығып жансақтау бөліміне түскен. Сол күнгі кезекші акушер Әдеміні әжетханадан тауып алғанын айтады.

"Бірнәрсе тарс ете қалды. Тазалаушы да, мен де естідім. Өйткені кәдімгідей тыныш болған, балалар да жыламаған. Түнгі сағат 02:38-де әжетханаға жүгіріп бардық. Барсам, мына есік ашылмайды. "Әдемі, Әдемі" дедім. Отыр екен. "Әдемі, Әдемі" десем, естімейді", – дейді кезекші акушер Сандуғаш Бекенова.

Бірақ бұл айтылғанды туыстары жоққа шығарады. Олардың айтуынша, Әдемі әжетханада ұзақ жатып қалған. Өйткені бейне бақылаудағы уақыт пен дәрігерлердің айтқаны сай келмейді. Ал жансақтау бөлімінің дәрігерлері жарытып жауап бере алмады.

"Бізден әлі жауап алынып жатыр. Әлі сот сараптамасы жүріп жатыр. Мен толық ақпарат бере алмаймын. Жансақтауға кіргенде жаны болды ма, болмады ма ол жағын айта алмаймын. Ештеңе айта алмаймын. Әжетханада қалай жатып қалғаны туралы да ештеңе айта алмаймын", – дейді жансақтау бөлімінің дәрігері Ғани Байсымаков.

Фото: Pixabay.com