Оңтүстік Африка Республикасында заңсыз барда болған атыс салдарынан кемінде 11 адам көз жұмды, оның ішінде үш бала бар, деп хабарлайды Malim.kz. AP.news агенттігіне сілтеме жасап.
Оқиға ел астанасы Преторияның батысындағы хостелде орналасқан барда болған. Полицияның дерегінше, 10 адам оқиға орнында қаза тапқан, тағы бірі ауруханада көз жұмған. Құрбандар арасында 3 және 12 жастағы екі ұл бала және 16 жастағы қыз бар. Ауруханаға 14 жараланған адам жеткізілді.
Полиция үш күдіктіні іздестіріп жатыр. Алдын ала мәлімет бойынша, кемінде үш қарулы адам хостелге кіріп, ондағы адамдарға оқ жаудырған. Қылмыстың себебі әзірге анықталмаған.
62 миллион халқы бар ОАР әлемдегі кісі өлтіру көрсеткіші ең жоғары елдердің бірі саналады. 2024 жылы елде 26 мыңнан астам кісі өлтіру тіркелген — бұл тәулігіне 70-тен аса жағдай деген сөз. Олардың басым бөлігі атыс қаруымен жасалған.
