10 жастағы тәжік баласын айуандықпен өлтірген 15 жастағы жасөспірімнің әрекетінің себептерін талдаған дәрігер-психиатр Василий Шуров оның интернетте араласқан адамдар тарапынан арбауға түсіп, қылмысқа итермеленуі мүмкін екенін айтты, деп хабарлайды Malim.kz.
Қайғылы оқиға қарсаңында Тимофей сыныптастарына «Менің ашуым» атты 11 беттен тұратын манифест жолдаған. Мәтінде ол қоғамға деген өшпенділігін білдіріп, адамдарды ұлты мен дініне қарай бөліп-жарған.
Қылмыстан кейін оның жеке Telegram-арнасында (кейін өшірілген) аватарларында украиналық рәміздері бар адамдардан қолдау пікірлері пайда болған. Олар Тимофейдің әрекетін ақтап қана қоймай, виртуалды сыйлықтар жіберіп, оны «құтқарып аламыз» деп уәде еткен.
Осыдан кейін жасөспірімді қайғылы оқиғаға дейін белгілі бір адамдар қашықтан ықпал етіп, психологиялық тұрғыда дайындаған болуы мүмкін деген болжам айтылды.
«Жасөспірімді өңдеп, қылмысқа итермелеген болуы әбден мүмкін. Жалпы жасөспірімдер өте осал келеді», – деді Шуров.
Қылмыс жасаған баланың отбасы туралы не белгілі?
Шабуыл жасаған жасөспірімнің отбасы әлеуметтік желілерде жабық өмір салтын ұстанады. Белгілі болғандай, Тимофейдің ата-анасы ауқатты емес, ал мектептегі оқиға туралы әкесі жаңалықтардан білген. Олар әзірге журналистерге пікір беруден бас тартып отыр.
Отбасы Одинцово қаласынан 15 шақырым жердегі Сосны кентінде тұрады. Анасы соңғы уақытта жергілікті шипажайда жұмыс істеген, оған дейін түрлі медициналық орталықтарда қызмет атқарған. Оның әлеуметтік желідегі парақшасында дерлік сурет жоқ – тек бірнеше жыл бұрын түсірілген бір селфи ғана бар.
Айта кетерлігі, Тимофей мектепке шабуылды анасының туған күніне тура бір апта қалғанда жасаған. Әкесі туралы да мәлімет аз: алдын ала деректерге сүйенсек, ол бір кәсіпкердің жүргізушісі болып жұмыс істеп, жүк тасымалымен айналысады.
Отбасында Тимофейден бөлек екі қарындасы бар.
