Астанада қар түннен бері тоқтамады. Коммуналдық қызметтер күшейтілген режимге көшті

Елордада түннен бері қар тоқтамады. Қаланың коммуналдық қызметтері бірнеше ауысымда тәулік бойы күшейтілген режимде үздіксіз жұмыс істеп жатыр, деп хабарлайды Malim.kz.

Астана әкімдігінің мәлімдеуінше, бүгін қар тазалауға 1200-ден аса арнайы техника мен 2400-ден аса жол жұмысшысы жұмылдырылған.

9-ынан 10 қарашаға қараған түні қаладан 2400 текше метр қар шығарылды, бұл – 188 ауыр жүк рейсі. Ең алдымен, ережелерге сәйкес, жолдарда кептеліс болмас үшін өте қарқынды қозғалыс аймақтары тазартылады. Сондай-ақ, орташа қарқындылығы бар учаскелер-алаңдар, вокзал маңы аумақтары, тротуарлар, әлеуметтік нысандарға кірме жолдар және т. б. орындар қардан тазартылады, деп жазылған әкімдік хабарламасында.

Айта кетейік, қалада бірнеше жабдықталған қар полигоны бар. Олар техниканың нөмірлік белгілерін оқу жүйесімен жабдықталған, бейнебақылау камералары орнатылған, жарықтандыру қосылған.

Ауа райының қолайсыздығына байланысты Астана әкімдігі қала тұрғындары мен қонақтарынан жазатайым оқиғаларды болдырмау үшін көшеде жүргенде өте мұқият әрі сақ болуды сұрайды.

Фото: instagram/akimat__astana