Бүгін әлем мқсылмандарының ең ұлық мейрамы – Құрбан Айт! Елімізде құрбан шалу рәсімі биыл да офлайн және онлайн форматта өтіп жатыр, деп хабарлайды Malim.kz.
«Құрбан» сөзі араб тілінде «жақындау» деген мағынаны білдіреді, яғни жасаған сауап істер арқылы жүректі тазартып, Аллаға жақындай түсу. Ал «Айт» – «мереке», «мейрам», «қуаныш» деген сөз.
ҚМДБ ел азаматтарына, әсіресе қала тұрғындарына қолайлы жағдай жасау мақсатында құрбан шалу рәсімін қашықтан өткізуге арналған qurban2024.kz сайтын іске қосты. Құрбандық шалу рәсімін басқа біреуге тапсырып, оны осы істе өкіл етуге дінімізде рұқсат берілген.
Былтыр мүфтият қызметкерлері «Раббың үшін құрбан шал» қайырымдылық жобасы аясында 1 104 тонна құрбандық етін 123 594 отбасына, сонымен қатар, мүгедектер, зағиптар қоры, ауруханалар мен ардагерлер үйіне жеткізіп берді. Шара биыл да жалғаспақ.
Құрбандық еті әсіресе, су тасқынынан зардап шеккен отандастарымызға, қараусыз қалған қарттарға, жалпы әлеуметтік аз қамтылған отбастарына таратылмақ.
Айта кетейік, бүгінде әлем мұсылмандары қасиетті Мекке қаласында қажылық парызын өтеп жатыр. Солардың қатарында 5 мыңнан астам отандасымыз бар.
Фото: kazislam.kz
