«Дәлелдеп бере аламын»: Зайытов Абай опера театрындағы былық туралы айтты

Мәжіліс депутаты Ринат Зайытов театр өнерінің қазіргі жағдайы туралы комитет отырысында өңірлердегі театр ғимараттарында неліктен кешкі корпоративтер ұйымдастырылатынын және одан түскен қаражаттың қайда кетіп жатқанын сұрады, деп хабарлайды Malim.kz.

Өңірлердегі театр ғимаратының қалпын айтпағанда, Абай атындағы қазақ ұлттық опера және балет театры ашық түрде кіреберісін кешкі корпоратив кештерге жалға береді. Ол ақша қайда кетіп жатыр? Кіммен келісім жасалып жатыр? Неге Абай театрында кешкі сағат 6-дан түнгі сағат үшке дейін жеке кештер өтеді? Қандай заңға негізделген? деді Ринат Зайытов.

Зайытов бұл сөзінің дәлелі барын да алға тартты. Ол тіпті қай күні кімнің кеші өткеніне дейін білетінін жеткізді.

Елдегі жалпы театрлардың қызметін жақсарту, кадрларды даярлау аса маңызды. Бұл  мәселені шешу үшін мемлекет театр мен мәдениет үйлерімен бірге жұмыс істеуі керек. Сонда ғана біз халықтың мәдени қажеттілігін қанағаттандыра аламыз, деді мәжілісмен.

Фото: Мәжілістің баспасөз қызметі