Орал қалалық сотында ҚР ҚК 106-бабы 3-бөлігіне сәйкес айып тағылған В-ға қатысты үкім шықты.
БҚО сотынан алынған мәліметке қарағанда, биылғы 10 тамызда шамамен сағат 22.00-де аталған тұрғын саяжайда өзінің танысы Б-ны алкогольдік ішімдік ішуге шақырған.
Алкогольдік ішімдіктерді ішкеннен кейін В. өзінің танысын шығарып салуды ұйғарып, сол жерден кетіп бара жатқанда, олардың арасында жанжал туындап, соңы төбелеске ұласқан. Соның барысында В. танысының ішіне пышақ салған. Салдарынан Б. қалалық ауруханада есін жимай, көз жұмды.
«Сот іс материалдарын зерттей келе, сотталушының кінәсі абайсызда жәбірленушінің қайтыс болуына әкеп соқтырған денсаулыққа қасақана ауыр зиян келтірді деген қорытындыға келді.
В. 9 жылға бас бостандығынан айыру жазасын қауіпсіздігі орташа қылмыстық-атқару жүйесі мекемесінде өтеуге сотталды. Үкім заңды күшіне енген жоқ», - деп хабарлады ведомстводан.
Фото: freepik.com
