7 жасар баланы зорлау ісі. Прокурор Amanat-тың экс-қызметкерін өмір бойы бас бостандығынан айыруды сұрады

Жетісу облысында жеті жасар баланы зорлау ісі бойынша үкім жақында шығарылуы тиіс. Серікқан Жақыповқа өмір бойы бас бостандығынан айыру жазасы қаупі төніп тұр. Бұл туралы Orda.kz-ке сілтеме жасап Malim.kz хабарлайды. 

AMANAT партиясының бұрынғы қызметкері және Ақсу ауданы әкімі аппаратының экс-басшысы былтыр жазда ұсталды. Оның туысы сол кездегі шенеунікті жеті жасар баласын зорлады деп айыптап, арыз жазған. Кейін бұл айып тексеру кезінде расталды.

Бүгін Жетісу облысында соттың пікірталасы өтті. Мемлекеттік айыптаушы Ерлен Жантасов Жақыповқа өмір бойы бас бостандығынан айыру жазасын сұрады. Үкім жақын күндері шығуы мүмкін.

Серікқан Жақыпов 2020 жылдың күзінде Ақсу ауданы әкімі аппаратының басшысы қызметін атқарды. 2021 жылы мемлекеттік қызметшілердің этикасына жауапты уәкіл болды. Ал 2024 жылдың 31 наурызында аудандық мәслихаттың депутаты болып сайланды.

Фото: Gov.kz