Шымкентте көпірдің бір бөлігі опырылды
Тұрғындардың қалаға қатынауы қиындаған
![](/images/article-img/1600/22446-1717835039-m.jpg)
Шымкентте көпірдің бір бөлігі опырылып, Жаңаталап шағын ауданы тұрғындарының қалаға баруы қиындады, деп хабарлайды Malim.kz. Otyrar.kz жазуынша, көпір аталған қағын ауданды қаламен байланыстырып тұрған жалғыз өткел.
Оқиға орнында қазір апатты қалпына келтіру жұмыстары басталған. Тұран ауданы әкімі таңға дейін жергілікті тұрғындарды айналма жолмен қамтамасыз етуге уәде берді. Жергілікті тұрғындар әзірге жүруге болатын жалғыз қара жол ғана бар екенін, ол шамамен 6 шақырым екенін айтады. Көпір арқылы өтетін жолды полиция қоршауға алған.
Тұран ауданы әкімі Берік Әшірбековтің айтуынша, қалпына келтіру жұмыстары жүріп жатқандықтан жергілікті билік көлік қозғалысының жаңа бағытын қарастырып жатыр.
Жергілікті тұрғындардың айтуынша, өткел сонау кеңес заманында салынған, соңғы рет жөнделгеніне де бірнеше жыл болған.
Көпір құрылымының опырылуына биылғы көктемде жауын-шашынның мол болуы ықпал еткен болуы мүмкін.
Фото: otyrar.kz