Шымкент теміржол вокзалына әскерден оралғандар мінген пойыз бен Отан қорғауға енді аттанатын жастардың пойызы бір уақытта келіп тоқтады, деп хабарлайды Malim.kz.
Азаматтық борышын өтеген жігіттерді қарсы алу мен әскерге шақырылушыларды шығарып салу рәсімі «Оңтүстік» өңірлік қолбасшылығына қарасты механикаландырылған бригаданың әскери оркестрі ойнаған марш әуенімен өтті.
Бұл жолы запасқа шығарылған 40 сарбаз туған жеріне оралса, 30 бозбала әскер қатарына аттанып барады.
Аталған іс-шараға әскери қызметшілер ғана емес, жастардың туыстары мен достары, ардагерлер ұйымдарының өкілдері, сондай-ақ жергілікті әскери басқару органдарының басшылығы жиналды.
Шымкент қаласының қорғаныс істері жөніндегі департаментінің бастығы полковник Әбдіғабит Шегебаев жауынгерлерге Отан алдындағы абыройлы қызметі үшін алғысын білдірді.
Осыдан тура 1 жыл бұрын біз осы теміржол вокзалынан әскерге шақырылған 40 жігітті десанттық-шабуылдау бригадасына қызметке жіберген едік. Қарулы күштердің мұндай беделді бөлімшелеріне күш-қуат және психологиялық тұрғыдан жақсы дайындалған жастар ғана алынады. Енді олар эстафетаны сіздерге тапсырып отыр. Әрдайым осы сенімді ақтауларыңызға тілектеспін, – деді полковник Әбдіғабит Шегебаев.
«Қарулы күштердің ардагерлері» РҚБ Шымкент қаласы бойынша филиалының басшысы отставкадағы полковник Серікбай Оңбаев нағыз Отан қорғаушыларды тәрбиелеген сарбаз ата-аналарына алғысын білдірді.
Фото: Қорғаныс министрлігі
