Ақмола облысы Аршалы ауданында жол жөндеуге 1 млрд теңгені бір көзден бермек болған шенеунік жұмыстан қуылды. Аршалы ауданы прокуратурасы оның тұрғын үй-коммуналдық шаруашылық, жолаушылар көлігі және автомобиль жолдары бөлімінің конкурстық рәсім талаптарын бұзғанын анықтады.
Былтыр 29 сәуірде 15 шақырымдық «Екатеринбург-Алматы» автобанынан Берсуат ауылына дейінгі жолға күрделі жөндеу жүргізуге мемлекеттік сатып алу бойынша ашық конкурс жарияланған. Оны аудандық тұрғын үй-коммуналдық шаруашылық, жолаушылар көлігі және автомобиль жолдары бөлімі ұйымдастырған. «Алайда, сол жылдың 18 мамырында аталмыш бөлім басшысы заңды негізсіз аталған конкурсты өткізуден өз бетінше бас тартты. Бұл ретте тікелей шарт жасасу арқылы бір көзден алу тәсілімен 1 млрд теңгеден астам сомаға «Еңбек» ШЖҚ РМК-мен жолды күрделі жөндеуге шарт жасасу туралы заңсыз шешім қабылдады», - деді прокуратураның баспасөз қызметі.
Осы ретте аудан прокуратурасы заңсыз конкурстың күші жойып, шартты бұзған. Ал Аршалы ауданы ТКШ бөлімінің басшысы жұмыстан қуылды.
MalimBlocks
