Ақталғыш Ахметов, Тоқаев жолдаған «сәлем» және Сқақовтың тағдыры

Өткен аптада ШҚО әкімі Даниал Ахметов Риддердегі апатқа байланысты жиын өткізген. Ол онда Риддер қаласындағы жылу электр орталығындағы апатқа энергетика министрлігін айыптай сөйлеген.

«Дер кезінде ЖЭО жылыту маусымына дайын емес екендігі жайлы, ондағы құрылғылардың ауыр жағдайы туралы дабыл қағудың, прокуратураға және басқа да органдарға жүгінудің орнына, ведомство бірнеше кішігірім әкімшілік айыппұлдармен шектелген. Бұны мен әрекетсіздік және немқұрайлық дер едім. Ведомство өзінің әрекетсіздігімен 60 мыңға жуық халқы бар қаланы қиын жағдайға душар етті. Мен мұндай жауапсыз, өз ісіне немқұрайлы қарайтын шенеуніктерге мемлекеттік қызметте орын жоқ екеніне сенімдімін», – деген Ахметов.

«Немқұрайлы шенеуніктерге мемлекеттік қызметте орын жоқ», деп, министрліктің жергілікті өкілдеріне мораль оқыған және бүкіл бір ведомствоны кінәлаған Ахметовтің бұл мәлімдемесіне Энергетика министрі Болат Ақшолақов жауап берген жоқ. Есесіне, министрліктің ШҚО-дағы өкілі – ҚР Атомдық​ және энергетикалық қадағалау мен бақылау комитеті департаментінің басшысы Еркебұлан Сергебаев «біз білген жоқпыз», деп, бар кінәні «4-ші және 5-ші қазандықтардағы ақау туралы ведомстводан жасырып қалған» ЖЭС басшылығына аудара салды.

Облыс әкімі  министрлікті, министрлік станция басшылығын кінәлаған бұл тізбекке енді президент қосылды. Бір қызығы, президент Ақшолақовты «немқұрайлысыңдар» деп кінәлаған Ахметовтің өзіне «немқұрайлылық» бойынша ренжіп отырған сияқты. Ол өзі төраға ретінде қатысқан Үкіметтің кеңейтілген отырысында Екібастұздағы жағдайды айта келіп, Риддер мен Шемонаиха қалаларындағы жағдайға тоқталды.

«Шығыс Қазақстан облысындағы Риддер мен Шемонаиха қалаларындағы жылумен қамту жүйелері толықтай тозып біткен. Мен үкіметке энергия объектілерін дер кезінде қалыпқа келтіруді бақылауға алу туралы тапсырма бердім. Әкімдіктер де өздігінен шеше алмайды, бәрін үкіметке сілтейді. Бұл сіздердің де нысандарыңыз, сіздердің жауапкершілік аймағыңыз», - деді Қасым-Жомарт Тоқаев.

Тоқаев бұл сөзді Ахметовтің мәлімдемесі үшін арнайы айтты ма, әлде, жалпы жағдайға қарап берген бағасы ма, оның аса маңызы жоқ. Маңыздысы, жақында ғана өзі қайта тағайындаған ең кәрі әкім басқарып отырған облыстағы жағдайға ерекше тоқталуы және кәрі тарлан Ахметовтің өзіне «жауапкершілік аймағы» туралы ескерту жасауы. Президент жолдаған «сәлемнен» кейін, бұған дейін министрлікті ғана кінәлап келген Ахметов енді өзі басқарып отырған әкімдік өкілдеріне де «тәйт» деп қоятын шығар. Тіпті, өзі айтқандай, немқұрайлылық танытқаны үшін өз кадрларының да мемлекеттік қызметтегі орны туралы ойлана бастар...

Айтпақшы, Ахметов осыдан бір ай бұрын, апат енді болып жатқанда ЖЭС-ті қаланың коммуналдық меншігіне қайтару туралы жұмыс істеп жатқанын айтқан. Бұл да сол кездің өзінде «біздің тікелей қарамағымызда болмаған соң осылай болды» деп, ақталуға тырысуы еді. Қысқасы, Риддердегі апат қайталанса, Ахметовті де Павлодар облысының бұрынғы әкімі Әбілқайыр Сқақовтың тағдыры айналып өтпеуі мүмкін. Өйткені, бүгінгі баяндамасында Тоқаев «Екібастұздағы жағдайдан кейін облыс әкімінің орнынан кеткеніне» ерекше мән бере сөйледі.