Аркадагтың баласы Тоқаевтан озып кетті
Түркіменстан сайлау комиссиясы елдегі президент сайлауында Сердар Бердімұхамедов жеңіске жеткенін хабарлады. Комиссияның қорытындысы бойынша сайлаушылардың 72,97 пайызы жас Бердімұхамедовтың кандидатурасын қолдаған.
40 жастағы Сердар Бердімұхамедов елдің бұрынғы президенті Гурбангулы Бердімұхамедовтің үлкен ұлы. Осыған дейін Ашхабад әкімі, Мәжіліс төрағасы, премьер-министр орынбасары болған.
Биыл 11 ақпан күні үлкен Бердімұхамедов парламенттің жоғарғы палатасында өткен отырыста өзінің отставкаға кетіп, «жастарға жол беретінін» айтқан. Оның алдында ел конституциясына өзгеріс енгізіп, президенттікке үміткер болуды 40 жасқа дейін түсірген. 12 ақпан күні сайлау 12 наурызға белгіленіп, екі күннен кейін яғни 14 ақпанда Түркіменстан демократиялық партиясының съездінде бірауыздан жас Бердімұхамедов кандидатурасы ұсынылған.
Айта кетейік, осыдан бұрынғы 2017 жылы болған президент сайлауында Гурбангулы Бердімұхамедовті сайлаушылардың 97,69 пайызы қолдаған. Жас президентті қолдаушылар саны әкесімен салыстырғанда 25 пайызға аз. Алайда бұл Орталық Азия елдеріндегі ең төменгі көрсеткіш емес. Қазіргі басшылар арасынан ең аз дауысты Қазақстан президенті Қасым-Жомарт Тоқаев (2019 жылғы сайлау - 70,96%) жинаған. Ең көп дауыс Тәжікстан лидері Эмомали Рахмон да (2020 жылғы сайлауда - 90,9%), екінші орында Өзбекстан басшысы Шавкат Мирзиёев (2021 жылғы сайлауда – 80,12%), үшінші орында Қырғызстан президенті Садыр Жапаров (2021 жылғы сайлауда – 79,2%).
