Бас прокуратура Ерлан Тұрғымбаевқа қатысты мәлімдеме жасады
Мәлімдемеде экс-министрден жауап алынғаны айтылған.
Бас прокуратура Ішкі істер экс-министрі Ерлан Тұрғымбаевты және полиция органдарының басқа да басшыларын қылмыстық қудалау туралы таралған ақпаратқа қатысты мәлімдеме жасады.
«2022 жылдың басынан бастап Бас прокуратура Қаңтар оқиғасы кезінде құқықтық тәртіп пен қауіпсіздікті қамтамасыз етпеуге, сондай-ақ азаматтарды азаптауға байланысты күш органдарының қызметкерлеріне қатысты тергеп-тексерулерді жалғастыруда. Облыстық полиция және ұлттық қауіпсіздік органдарының бірқатар басшылары мен қызметкерлері сотталды. Жүргізіліп жатқан тергеп-тексерулер шеңберінде Ішкі істер экс-министрі Ерлан Тұрғымбаевтан жауап алынды», - делінген хабарламада.
Сондай-ақ, Бас прокуратура Алматы облысы Қарасай ауданы Қошмамбет ауылында орналасқан арнайы қабылдау бөлінімде ұсталған азаматтарды азаптау туралы іс бойынша дәлелдемелер жинаған.
«16 наурызда осы қылмысты жасағаны үшін Қарасай ауданының арнайы қабылдау орны және полиция басқармасының бұрынғы басшылары қамауға алынды. Бұдан басқа, қызметтік атыс қаруын ұрлау фактілері бойынша Талдықорған қаласы полиция басқармасының бұрынғы басшылығына қатысты тергеп-тексеру жалғасуда», - делінген Бас прокуратура мәлімдемесінде.
ФОТО: ИНТЕРНЕТТЕН
