«Қарасора-2022» операциясы кезінде 9,7 тонна есірткі тәркіленді. Бұл туралы Ішкі істер министрлігі Есірткі қылмысына қарсы іс-қимыл департаментінің басқарма басшысы Бақытжан Әмірханов айтты.        

«Биылғы 1 маусым мен 30 қазан аралағында «Қарасора-2022» жедел-профилактикалық іс-шарасы өтті. Операция кезеңінде республика бойынша 1275 қылмыс тіркелді. Оның ішінде есірткі сатудың 667 (454) қылмысы, 178 заңсыз сақтау және есірткі өсірудің 245 дерегі анықталды», - деді Бақытжан Әмірханов.

Осы орайда ол полиция қызметкерлері 9,7 тонна есірткіні, оның ішінде 2,3 тонна марихуана, 200 келіге жуық гашиш, 113 келі синтетикалық есірткі, 7 тоннаға жуық қарасора тәркілегенін мәлімдеді.

Әмірхановтың  айтуынша, биыл тамыз және қыркүйек айларында Қызылорда және Түркістан облыстарының аумағында тікұшақтармен әуеден барлау жұмыстарын жүргізді. Осы орайда әуе көлігімен марихуана сақтаудың 2 фактісі, есірткі дақылдарын егудің 19 фактісі анықталды.

Сонымен қатар ол Жамбыл облысындағы жабайы өсетін қарасора алқабы 148 мың гектардан асатынын айтты. Бұдан бұрын хабарланғандай, қаңтар айынан бері 2,5 мыңға жуық есірткі қылмысы анықталған.