Экс-денсаулық сақтау министрі Елжан Біртанов пен оның бұрынғы орынбасары Олжас Әбішевке қатысты сотқа дейінгі тергеу амалдары аяқталды.
«Бұрынғы денсаулық сақтау министрі Елжан Біртанов пен вице-министр Олжас Әбішевке қатысты сотқа дейінгі тергеу амалдары аяқталды. Біртанов пен Әбішев істен шыққан денсаулық сақтау платформасын қабылдап, пайдалануға беру арқылы қызметін асыра пайдаланды деп айыпталып отыр. Қазіргі уақытта медициналық мекемелер платформаны пайдаланып жатқан жоқ. Бұған жинақталған дәлелдер бар. Жүзеге аспаған жұмыс құны 4,1 миллион доллар немесе 1,5 миллиард теңгені құрайды», - делінген қаржылық мониторинг агенттігі таратқан мәлімдемеде.
Бұдан бөлек, мәлімдемеде Елжан Біртановтың қызметтік ұшақты жеке мақсаттарына пайдаланғаны жөнінде айтылған.
«Біртанов 2020 жылдың маусым айында санитарлық авиация ұшағын жеке мақсатына пайдаланды деген күдікке ілінген», - делінген мәлімдемеде.
Бұрынғы денсаулық сақтау министрі Елжан Біртанов қазір үй қамақта отыр. Ол өзіне тағылған айыппен келіспейді. Бұған дейін оның адвокаты Дмитрий Куряченко «тергеу органдарының жұмысы істі обьективті қарау емес, Біртановты қудалауға бағытталып отыр», -деп мәлімдеген.
Елжан Біртанов 2017-2020 жылдар аралығында денсаулық сақтау министрі болып қызмет атқарған. Ол былтыр коронавирус өршіп, ауруханаларда орын жетпей қалған тұста отставкаға кеткен. Оның орынан қазіргі денмин Алексей Цой келген.
Елжан Біртановтың орынбасары болған Олжас Әбішев 2020 жылдың тамыз айында ұсталған. Оған ақпараттық жүйелерді құруға бөлінген 500 миллион теңгені жымқырды деген айып тағылған.
Байланысты жаналықтар
MalimBlocks
