Қазақстанда қайталама нарықтағы пәтер бағасы әлі де жоғары деңгейде қалып отыр. Биылғы тоғыз айда зерттеуге енген 18 қаланың 12-сінде баспана қымбаттаған. Ал бір жыл ішінде баға 16 қалада өскен, деп хабарлайды Malim.kz.
Қыркүйек айында жылжымайтын мүлік нарығында айтарлықтай өзгеріс болмаған. Ел бойынша сатылымға қойылған қайталама тұрғын үйлердің орташа бағасы тамызбен салыстырғанда небәрі 0,3%-ға өскен.
Сарапшылардың байқауынша, соңғы бірнеше айда қайталама нарықта баға күрт құбылмай отыр. Пәтер иелері баспанасын әлі де жоғары бағамен сатылымға шығарса, сатып алушылар келіссөз кезінде құнын төмендетуге тырысады. Саудаласу барысында баға көбіне 1–7%, ал жекелеген жағдайда 10%-ға дейін түсуі мүмкін. Сондықтан мамандар биыл күзде пәтер бағасы жаппай арзандайды деп күтпейді. Нарықтағы негізгі өзгеріс саудаласу арқылы жүруі ықтимал.
Жыл басынан бері қай қалаларда баспана қатты қымбаттады?
Krisha.kz мониторингіне сәйкес, 2026 жылдың басынан бері ең жоғары өсім Көкшетауда тіркелген. Мұнда қайталама нарықтағы шаршы метр бағасы 9,9%-ға көтерілді.
Одан кейін Павлодарда баға 7,3%, Астанада 6,9%, Қарағандыда 6,4%, Семейде 6,2%-ға өскен. Ал Алматыда керісінше, жыл басымен салыстырғанда шаршы метрдің орташа бағасы 1,1%-ға арзандады.
Баға төмендеген қалалардың қатарында Ақтау да бар. Онда тоғыз айда пәтер құны 5,2%-ға түскен. Ақтөбеде – 4,8%, Атырауда – 1,9%, Шымкентте – 1,4%, Қызылордада – 1,2% төмендеу байқалған.
Бір жылда Астана мен Көкшетауда баға айтарлықтай өсті
2025 жылдың қыркүйегімен салыстырғанда Қазақстанның 18 қаласының 16-сында пәтер қымбаттаған.
Ең жоғары жылдық өсім Көкшетауда тіркеліп, 13,4%-ға жетті. Астанада пәтер бағасы бір жылда 11,8%, Қарағандыда 10,3%, Павлодарда 9,5%, Қостанайда 9,1%-ға өскен.
Алматыда бір жыл ішіндегі өсім 3,7%-ды құрады.
Жылдық есеп бойынша баға тек екі қалада төмендеген: Ақтауда – 3,8%, Атырауда – 1,5%.
Қыркүйекте не өзгерді?
Қыркүйекте ең жоғары айлық өсім Қарағандыда байқалды. Мұнда сатылымдағы пәтерлердің орташа бағасы бір айда 1,6%-ға көтерілген. Астана мен Көкшетауда – 1,5%, Оралда – 1%.
Ал Ақтауда бір айдың ішінде баға 2,3%-ға төмендеді. Қызылордада 0,8%, Түркістанда 0,7% арзандаған. Шымкентте көрсеткіш 0,1%-ға төмендеген.
Ең қымбат баспана қай қалада?
Қыркүйек қорытындысы бойынша Қазақстандағы ең қымбат қайталама тұрғын үй Алматыда. Мұнда бір шаршы метрдің орташа ұсыныс бағасы 796 144 теңгеге жеткен.
Екінші орында Астана – 611 306 теңге. Үшінші орында Шымкент тұр, онда бір шаршы метр орта есеппен 472 570 теңге тұрады.
Ал зерттелген қалалардың ішінде ең арзан шаршы метр Қызылордада тіркелген – 262 488 теңге.
Айта кетейік, бұл көрсеткіштер нақты жасалған мәмілелердің бағасын емес, сатушылардың хабарландыруда көрсеткен орташа ұсыныс бағасын білдіреді. Сондықтан пәтердің түпкілікті сатылатын құны саудаласу нәтижесінде төмен болуы мүмкін.
