Тоқаевтан кейінгі Президент Ата заңға өзгерту енгізе ала ма? Бұл сұраққа Әділет министрі Қанат Мусин жауап берді. 

Парламент палаталарының бірлескен отырысынан кейін БАҚ өкілдері министрден: «Келесі Президент Конституцияға өзгерту енгізе ала ма?» деп сұрақ қойды.

«Конституцияда Конституцияны «неше рет өзгертуге болады, қашан өзгертуге болады» деген норма жоқ. Ол қоғамның дамуына байланысты. Сондықтан, әрине өзгерту енгізуге болады», - дейді министр Мусин.

Сонымен қатар ол мемлекетті басқаратын келесі адам президенттік мандатының мерзімін және бір рет қана сайлану құқығына қатысты норманы өзгерте алмайтынын баса айтты.

Айта кетейік, бүгін депутаттар «Қазақстан Республикасының Конституциясына өзгерістер мен толықтыру енгізу туралы» заң қабылдады. 

  Осыған сәйкес, Президенттің мандаты қайта сайлану мүмкіндігінсіз бір мерзімге шектеліп, жеті жыл мерзімге ұзартылады; Нұр-Сұлтан қаласының атауы қайтадан Астана болып өзгереді; Конституциялық Сот судьяларының өкілеттік мерзімі 8 жылға дейін ұлғайтылады.