Тоқаев Қазақстан кәсіпкерлері Конгоның тау-кен саласын зерттеуге дайын екенін мәлімдеді
Темір, фосфат, боксит және басқа да сирек кездесетін минерал кеніштерін барлау және игеру үшін бірлесе жұмыс істеуге мүмкіндік бар.
Бұл туралы бүгін Ақордада журналистерге арнап брифинг өткізген Қазақстан президенті Қасым-Жомарт Тоқаев мәлім етті, деп хабарлайды Malim.kz.
БАҚ өкілдеріне арналған брифингте екі елдің экономикалық, әлеуметтік салалардағы ынтымақтастығы талқыланды. Бұған дейін хабарлағынымыздай, Тоқаев Конго жастарын Қазақстанда білім алуға шақырған.
Қазақстанның Конгоға дәнді дақылдарды экспорттауға қатысты әлеуеті мол екеніне назар аудардық. Өздеріңізге мәлім, екі елдің де табиғи ресурстары мол. Темір, фосфат, боксит және басқа да сирек кездесетін минерал кеніштерін барлау және игеру үшін бірлесе жұмыс істеуге мүмкіндік бар. Қазақстан кәсіпкерлері Конгоның тау-кен саласын зерттеуге дайын екенін келіссөз барысында атап өттім, – деді Қазақстан президенті.
Ақордадан мәлім еткендей, Конго президенті Қазақстанның мұнай саласына көз тіккен көрінеді.
Конго экономикасы мұнай өнеркәсібіне негізделген. Қазақстанның осы салада тәжірибесі мол. Бұдан бөлек пайдалы қазбалардың өзге де түрлерін игеруде ықпалдастық орната аламыз. Бұл орайда Конгоның энергетика секторы қазақстандық операторларға зор мүмкіндік ұсынады, – деді Конго президенті Дени Сассу-Нгессо.
Фото: Ақорда
