Украина президентіне Түркияға шабуылдауды ұсынған қазақстандық депутат кешірім сұрады
Ол Қырымнан гөрі, Түркия тартымдырақ деп жазған
Украина президенті Владимир Зеленскийге Қырымның орнына, Түркияға шабуыл жасауды ұсынған қазақстандық депутат Анна Башинская халықтан кешірім сұрады.
«Аманат» партиясынан сайланған Алматы қаласы мәслихатының VIII шақырылымының депутаты Анна Башинская Facebook -тегі Deutsche Welle парақшасындағы жазбаның астына пікір қалдырған. Онда ол «Түркия тартымдырақ, Зеленский мырза! Ол жерде жыл бойы жылы» деп жазды.
«Мен Украина президентінің Facebook-тегі "Deutsche Welle"мәлімдемесіне пікір жаздым. Түркия туралы жазған кезде мен қатты қателестім. Бауырлас түрік халқынан кешірім сұраймын! Украина мен Ресей халқына бейбітшілік тілеймін. Кешіріңіздер, бұл менің қателігім. Менің бұл жағдайға комментарий беруге құқығым жоқ, біздің өз еліміз бар және депутат ретінде бірінші кезекте ойлануым керек еді. Мен азаматтарымыздан және партияларымыздан кешірім сұраймын»,-деп жазды ол.
Мақалада Зеленскийдің аннексияланған Қырымды Украинаның бақылауына қайтаруын көздейтін қарсы шабуыл жоспарлағаны жазылған. Президент Yle арнасына берген сұхбатында Украинаның табысы негізінен Батыстың Киевке қару-жарақ жеткізуді жалғастыра беруіне байланысты екенін атап өтті. Ол сондай-ақ жетістіктерге деген үмітке қарамастан, соғыс ондаған жылдарға созылуы мүмкін екенін мәлімдеген.
Желі қолданушылары Башинскаяның Қазақстан азаматы бола тұра, басқа елдің президентіне ұсыныс жасағанын сынап жатыр.
