2023 жылдың 11 қаңтары күні «Арқанкерген» оқиғасына байланысты өмір бойына бас бостандығынан айырылған Владислав Челах Президент Қасым-Жомарт Тоқаевқа хат жазған. Ол хатында президенттен қылмыстық істің ақ-қарасын ажыратуды сұраған болатын. Бүгін Челахтың апелляциялық шағымына байланысты Ұлттық қауіпсіздік комитеті төрағасының орынбасары - Шекара қызметінің директоры Ерлан Алдажұманов жауап берді.
Сенат кулуарында журналистер Шекара қызметінің директорынан 2012 жылы «Арқанкерген» бекетінде болған оқиғаға қатысты бар шындықты айтамын деген Челахтың мәлімдемесіне қатысты пікір беруін сұрады.
«Бұл жерде пікір беру артық деп ойлаймын. Оқиға болған жылы қылмыстық іс қозғалды. Сол кезде жағдай толық анықталды деп ойлаймын. Оның не айтқысы келетінін білмеймін. Қылмыстық іс жүрді, тергеу толық көлемде өтті, бұл нәтижелер қисынды соңына дейін жеткізілді. Егер мәлімдемелер болса, соған қарайық, әңгіме не туралы екен, өйткені қазір оның не айтарын білмеймін», - деді Ерлан Алдажұманов.
ҰҚК өкілінің айтуынша, Шекара қызметінің қызметтік ұстанымы тергеу ұстанымы мен соттың қорытындысына сәйкес келеді.
Еске салайық, бұған дейін бірқатар БАҚ Владислав Челах «Арқанкерген» бекетіндегі 15 адамның өліміне қатысты жағдайды түсіндіруге дайын екенін мәлімдегенін хабарлаған болатын. Челах 2012 жылдың мамырында «Арқанкерген» шекара бекетінде 14 қызметтесі мен бір орманшыны өлтірді деп айыпталған.
Байланысты жаналықтар
MalimBlocks
