Қарағанды қаласындағы Федоровское су қоймасында екі үндістандық студенттің суға батып кетуі қайғылы оқиғаға айналды. Оқиға 30 мамыр күні түстен кейін шомылуға тыйым салынған аумақта болған, деп хабарлайды Malim.kz.
Қарағанды облыстық Төтенше жағдайлар департаментінің мәліметінше, қаза тапқандар 21 және 22 жастағы азаматтар болған. Құтқарушылар олардың денелерін жағалаудан шамамен 15 метр қашықтықта және бес метр тереңдіктен тапқан.
ТЖД өкілдерінің айтуынша, қайғылы жағдай орын алған аумақ шомылуға арналмаған әрі демалушылар үшін қауіпті саналады. Бұл жерде су қоймасының түбі тегіс емес, ал тереңдігі кенет өзгеріп отырады.
– Оқиғаның мән-жайы анықталып жатыр. Аталған орын шомылуға рұқсат етілмеген аумақ болып табылады, – деп хабарлады ведомствоның баспасөз қызметі.
Құтқарушылар су айдындарының қауіпсіздігін сыртқы көрінісіне қарап бағалау мүмкін емес екенін ескертті. Сондықтан адам өмірі мен денсаулығына қауіп төндіретін жерлерде арнайы тыйым салу белгілері орнатылған.
Осыған байланысты Төтенше жағдайлар департаменті тұрғындар мен өңір қонақтарын судағы қауіпсіздік ережелерін қатаң сақтауға шақырды. Мамандар белгіленбеген жерлерде шомылмауға, балаларды қараусыз қалдырмауға және мас күйде суға түспеуге кеңес береді.
