Ұлттық банктің 5 маусымда базалық мөлшерлеме жөнінде қабылдайтын шешімі қарсаңында бірқатар екінші деңгейлі банктер ұзақ мерзімді депозиттер бойынша сыйақы мөлшерлемелерін төмендете бастады, деп хабарлайды Malim.kz.
Қаржы сарапшылары жоғары табысты депозит ашуды жоспарлап жүрген азаматтарға шешімді кейінге қалдырмауға кеңес береді.
Қазақстанның депозиттерге кепілдік беру қорының мәліметінше, банктер 12 және 24 айлық жинақ салымдары бойынша ең жоғары мөлшерлемелерді біртіндеп қысқартып жатыр. Мамандар мұны нарықтың Ұлттық банктің алдағы шешіміне қатысты күтулерімен байланыстырады.
Қазір базалық мөлшерлеме 18 пайыз деңгейінде. Сарапшылар жылдың екінші жартысында ақша-кредит саясаты жұмсаруы мүмкін екенін және соған сәйкес базалық мөлшерлеме төмендеуі ықтимал екенін айтады. Мұндай жағдайда банктердің депозиттер мен несиелер бойынша ұсынатын мөлшерлемелері де өзгеруі мүмкін.
Сарапшылардың пікірінше, ұзақ мерзімді депозитті дәл қазір ашқан салымшылар қолданыстағы жоғары пайыздық мөлшерлемені бүкіл мерзімге бекітіп ала алады. Кейбір банктерде мұндай салымдардың табыстылығы әлі де жылдық 17,5-18,5 пайыз деңгейінде сақталып отыр.
Қазіргі таңда Қазақстандағы жылдық инфляция 10,6 пайызды құрайды. Сондықтан жоғары мөлшерлемемен ашылған депозит қаражатты инфляциядан қорғап қана қоймай, қосымша нақты табыс табуға мүмкіндік беруі мүмкін.
Мамандар депозит таңдағанда тек пайыздық мөлшерлемеге ғана назар аудармауға шақырады. Салымның шарттары, ақшаны мерзімінен бұрын алу мүмкіндігі, шотты толықтыру тәртібі және мемлекеттік кепілдік көлемі де маңызды рөл атқарады.
ҚДКБҚ мәліметіне сәйкес, ұлттық валютадағы жинақ салымдары бойынша мемлекет бір банктегі 20 миллион теңгеге дейінгі қаражатқа кепілдік береді. Ал басқа теңгелік депозиттер үшін кепілдік мөлшері 10 миллион теңгеге дейін белгіленген.
