РФ Қарулы күштерінің стратегиялық мақсаттағы ракета әскерлері базасында, Орынбор облысының Орск маңындағы Ясный қаласы түбінде зымыранды іске қосу сәтінде апат болды, деп хабарлайды Malim.kz. DW-ге сілтеме жасап.
Алдын ала мәліметтерге сәйкес, 28 қараша күні күндіз зымыран басқарудан шығып, құлап, жарылған. Жарылыс туралы ақпаратты куәгерлердің мәлімдемелері мен әлеуметтік желілердегі жарияланымдар да растаған.
Жергілікті тұрғындар әлеуметтік желілерде әскери нысан ауданында көтерілген қою түсті түтіннің фотосын жариялады. Қалалық чаттарда түтіннің өткір иісі мен тыныс алуға қатысты шағымдар да пайда болғаны хабарланды. Бұл туралы өңірлік 56orb басылымы жазды.
Украиналық Supernova+ жобасы зымыранның ұшырылуы мен құлау сәті түсірілген деген видеоны жариялады. БАҚ дерегінше, оқиға Домбаровский позициялық ауданында – Ясный әскери космодромы орналасқан жерде болған.
Ресми органдар тарапынан әзірге түсініктеме берілмеді.
