Алматыда Алтынбек Сәрсенбайұлына арналған ғылыми конференция өтті

Алматыдағы Ұлттық кітапханада саясаткер, оппозициялық қайраткер, марқұм Алтынбек Сәрсенбайұлының 60 жылдығына арналған ғылыми конференция өтті.

Ұйымдастырушылар бұл Алтынбектанудың алғашқы сатысы екенін айтады. Жиында Алтынбек Сәрсенбайұлының саяси мұрасы, ұсынған бағдарламаларының ешқашан құнын, маңызын жоймайтыны көп айтылды. Билікте жүріп, саяси жүйенің қателіктерін түзеуге бар күшін салған, ақыры, оппозицияға кеткен саясаткердің ерлігі, оның әлі күнге сыры ашылмаған жұмбақ өлімі, оның өмір жолы, азаматтық тұлғасы туралы сөз болды.

Саясаттанушы Шалқар Нұрсейіт арнайы баяндама жасап, «тәуелсіз елдің тәуелсіз азаматтары өздері үшін және болашақ ұрпағы үшін бейбіт саяси күресті бүгін бастаймын десе, Алтынбек Сәрсенбайұлының саяси мұрасы темірқазық болуға дайын» екенін айтты.

Ұйымдастырушылардың бірі Сағатбек Медеубекұлы конференцияда негізінен Алтынбектанудың алдағы бағыты қандай болу керек деген мәселе көтерілгенін айтады.

«Тарих, филология, әлеуметтану, қоғамтану, саясаттану, журналистика ғылымында Алтынбектану деген бағытқа түрен салынды. Енді ғылыми негізде сараптап, Алтынбектей тұлғаның қалыптасуының негізі неде? Алтынбектің рухы кейінгі ұрпақтарға жұғысты болу үшін қайтпек керек? Қалай зерттеу керек? Қай бағытта, қай қырынан алып, саралау керек деген мәселелер қозғалды», – дейді ол.

Конференцияда осыдан екі ай бұрын жарияланған Баспасөзде және әлеуметтік желілерде эссе жанрындағы шығармаларға Алтынбек Сәрсенбайұлы атындағы жүлде үшін республикалық байқауының жеңімпаздары марапатталды. Және Сәрсенбайұлының жазбалары мен мақалалары, сұхбаттары, ол туралы жазылған мақалалар топтастырылған екі кітап таныстырылды. Ұймдастырушылар енді үшінші кітап шығармақшы, оған конференция барысында оқылған баяндамалар енгізілмек.

Биыл саясаткердің туғанына 60 жыл толуына орай бірнеше іс-шара ұйымдастырылды. Алматы облысы Райымбек айданы Сарыжаз ауылында ол оқыған мектепке Алтынбек Сәрсенбайұлы есімі берілді.